मुंबई, वृत्तसेवा | विधानसभा कामकाज सल्लागार समितीच्या बैठकीत विधानसभा अध्यक्षपदाच्या निवडणुकीची तारीख ठरविण्यात आली आहे. त्यानुसार २७ डिसेंबरला या निवडणुकीसाठी अर्ज दाखल करण्यात येतील. त्यानंतर २८ डिसेंबरला निवडणुकीसाठीचे मतदान पार पडेल.
विधानसभा कामकाज सल्लागार समितीच्या शुक्रवारी पार पडलेल्या बैठकीत विधानसभा अध्यक्षपदासाठी निवडणूक घेण्याबाबत निर्णय झाला. या बैठकीला महाविकासआघाडी आणि भाजपचे प्रमुख नेते उपस्थित होते. विधानसभा अध्यक्ष निवडणुकीत भाजपही आपला उमेदवार उतरविण्याची शक्यता आहे. यावेळी विरोधकांकडून हिवाळी अधिवेशनाचा कालावधी आठवडाभराने वाढवण्याची मागणी करण्यात आली. अनेक प्रश्नांवर राज्य सरकारने अद्याप उत्तरे दिलेली नाहीत. त्यामुळे अधिवेशनाचा कालावधी वाढवण्यात यावा, असे विरोधकांचे म्हणणे होते. मात्र, राज्य सरकारने अधिवेशनाचा कालावधी वाढवण्यास नकार दिला आहे. त्यामुळे हिवाळी अधिवेशन नियोजित वेळापत्रकाप्रमाणे २८ डिसेंबरला संपेल. याच दिवशी अध्यक्षपदाची निवडणूक पार पडेल. त्यामुळे प्रत्यक्ष कामकाजासाठी आजचा दिवस धरुन एकूण तीन दिवसच हातात उरतात. इतक्या कमी कालावधीत जनतेच्या समस्या कशा मांडणार, असा सवाल विरोधकांकडून उपस्थित करण्यात आला आहे.
