जळगाव (प्रतिनिधी) शासकीय अभियांत्रिकी महाविद्यालयाच्या वसतिगृहात मनपा प्रशासनाकडून कोविड केअर सेंटर आणि विलगीकरण कक्ष उभारण्यात आला आहे. रुग्णांना मिळणारी सोयसुविधा योग्यप्रकारे आहे की नाही याची महापौरांसह सर्वपक्षीय नगरसेवकांनी पाहणी केली. यावेळी त्याठिकाणी असलेल्या काही अडचणी दूर करण्यासाठी पाठपुरावा करून तातडीने सोयीसुविधा पुरविण्यात येतील असे महापौर सौ.भारती सोनवणे यांनी सांगितले.
मनपाच्या कोविड केअर सेंटर आणि विलगीकरण कक्षाबाबत असलेल्या अडचणींची प्रत्यक्षात पाहणी करून त्या दूर व्हाव्या यासाठी बुधवारी महापौर सौ.भारती सोनवणे यांनी सर्व गटनेत्यांची बैठक घेतली होती. गुरुवारी सकाळी १० वाजताच महापौर सौ.भारती सोनवणे यांच्यासह नगरसेवक कैलास सोनवणे, बंटी जोशी, उज्ज्वला बेंडाळे, चेतन सनकत, अमर जैन, ज्योती चव्हाण, गायत्री राणे, सुरेखा तायडे आदींनी कोविड केअर सेंटर गाठले.
शासकीय अभियांत्रिकी महाविद्यालयात, शासकीय तंत्रनिकेतन महाविद्यालय आणि आय.टी.आय.च्या वसतिगृहात सुरू करण्यात आलेल्या कोविड केअर सेंटर व विलगीकरण कक्षाला महापौरांसह सर्वांनी भेट दिली. त्याठिकाणी असलेले डॉक्टर, कर्मचारी, मनपा समन्वयक तसेच रुग्णांशी त्यांनी चर्चा केली. सर्वांच्या समस्या ऐकून घेत त्या तातडीने मार्गी लावण्याचे आश्वासन महापौरांनी दिले.
रुग्णांनी केल्या तक्रारी
महापौरांसह सर्वांनी प्रत्येक कक्षातील रुग्णांशी संवाद साधला असता डॉक्टर वेळेवर येत नाही, लहान मुलांना औषधी मिळत नाही, अहवाल यायला उशीर होतो, डॉक्टर, नर्स संख्या कमी आहे, चहासोबत बिस्कीट मिळत नाही, काढा येत नाही. वयस्कर व्यक्तींना खालील माळ्यावर हलवावे अशा तक्रारी त्यांनी मांडल्या. महापौर सौ.भारती सोनवणे यांनी याबाबत संबंधितांना सूचना देत पाठपुरावा करण्याचे आश्वासन दिले.
डॉक्टर, कर्मचाऱ्यांची मागणी
कोविड केअर सेंटर आणि विलगीकरण कक्षात पाहणी करताना डॉक्टर आणि कर्मचाऱ्यांशी देखील महापौरांनी संवाद साधला. त्यांनी आया, सिस्टर, डॉक्टर, कर्मचारी संख्या वाढवावी, अतिरिक्त रुग्णवाहिकेची व्यवस्था करावी, रुग्णांशी संपर्क साधायला माईक सिस्टीम हवी, समन्वयक अधिकाऱ्यांच्या मदतीला सहाय्यक कर्मचारी हवे, ४ वॉशिंग मशीन, ४ गरम पाण्याच्या किटली, प्रत्येक कक्षात स्वॅब घेण्याची व्यवस्था करावी अशा अडचणी त्यांनी मांडल्या. मनपा आयुक्त आणि संबंधित प्रशासकीय अधिकाऱ्यांशी याबाबत चर्चा करून तात्काळ अडचणी सोडविण्यात येतील, असे महापौर सौ.भारती सोनवणे म्हणाल्या.
अशी क्षमता, असे रुग्ण
मनपाकडून पॉझिटिव्ह रुग्णांसाठी ३ कक्ष तयार करण्यात आले आहे. त्यात कक्ष १ ची क्षमता ९८ असून तिथे ७८ रुग्ण आहे. कक्ष २ ची क्षमता ९६ असून ७४ रुग्ण आहे. कक्ष ३ ची क्षमता १२५ असून त्याठिकाणी १२१ रुग्ण आहेत. शासकिय अभियांत्रिकीच्या वसतिगृहातील विलगीकरण कक्षाची क्षमता १५० तर रुग्ण ११३, तंत्रनिकेतनच्या विलगीकरण कक्ष १ ची क्षमता १२६ तर रुग्ण ९७ आहे. तसेच कक्ष २ ची क्षमता १२६ असून ११२ रुग्ण आहेत. आयटीआयच्या विलगीकरण कक्षाची क्षमता २४० असून सध्या १२५ रुग्ण आहेत.
