पुणे प्रतिनिधी । भाजपाच्या आगामी प्रदेशाध्यक्षाची निवड १६ फेब्रुवारी रोजी नवी मुंबईत होणाऱ्या मेळाव्यात करण्यात येणार आहे. विद्यमान प्रदेशाध्यक्ष चंद्रकांत पाटील यांनी पुन्हा प्रदेशाध्यक्ष निवडीसाठी वरिष्ठांकडे फिल्डींग लावल्याची चर्चा सुरू होते. माजी मंत्री पंकजा मुंडे यांनाही अतिरिक्त जबाबदारी मिळण्याची शक्यता आहे. माजी मंत्री एकनाथ खडसे, विनोद तावडे आणि मुंडे यांनी देखील तयारी केली आहे.
भाजपच्या जिल्हा तथा शहर पातळीवरील संघटनात्मक बदल पूर्ण होण्याच्या मार्गावर आहेत. या शिवाय मुंबई प्रदेशाध्यक्षाचीही निवड करण्यात येणार आहे. नवी मुंबई येथे ११ हजार प्रमुख कार्यकर्त्यांच्या उपस्थितीत राज्य परिषद घेण्यात येणार आहे. यावेळी नव्या प्रदेशाध्यक्षांची निवड जाहीर करण्यात येणार असल्याचे पाटील यांनी जाहीर केले आहे.
राज्यात भाजपला सत्तेपासून दूर ठेवण्यास महाविकास आघाडीला यश आल्यानंतर माजी मुख्यमंत्री देवेंद्र फडणवीस यांना भाजपमधूनच प्रत्यक्ष, अप्रत्यक्षरित्या टीकेला सामोरे जावे लागले. खडसे, मुंडे यांनी आपली नाराजी सातत्याने स्पष्ट बोलून दाखवली. तावडे यांनी या विषयावर मौन धारण केले आहे. तावडे यांच्यावर निवडणुकीच्या काळात तसेच निवडणुकीनंतर केवळ प्रदेश कार्यालय सांभाळण्याची जबाबदारी देण्यात आली होती. तावडे यांनी गेली तीन महिने मुंबई सोडलेली नाही.
माजी मुख्यमंत्री, विरोधी पक्षनेते फडणवीस केंद्रात जाणार असल्याच्या जोरदार चर्चा झडत असतानाच प्रदेशाध्यक्षाची निवड हा कळीचा मुद्दा बनला आहे. पाटील यांची फेरनिवड झालीच, तर त्यामागे अनेक गणिते असल्याचे दबक्या आवाजात बोलले जात आहे. फडणवीस यांचा अर्थशास्त्रातील अभ्यास चांगला असल्याने त्यांच्याकडे केंद्रात वित्त विभागाची जबाबदारी देण्याबाबतही खासगीत बोलण्यात येत आहे. मात्र, असे काही घडेल, असे मला वाटत नाही, अशी स्पष्ट प्रतिक्रियाही फडणवीस यांनाही व्यक्त करून दिल्लीत जाण्याची शक्यता फेटाळली आहे.
