मुंबई वृत्तसंस्था । देशभरात सलग दहा दिवस इंधन दरवाढ सुरुच असल्याने वाहनचालक पुरते त्रस्त झाले आहेत. आधीच ‘कोरोना’च्या पार्श्वभूमीवर खिसा गरम झाला असताना पेट्रोल-डिझेलचे दर भडकत असल्याने सर्वसामान्य नागरिक कात्रीत सापडले आहेत. गेल्या दहा दिवसात पेट्रोल तब्बल साडेचार रुपयांनी महाग झाले आहे.
आंतरराष्ट्रीय बाजारात कच्च्या तेलाचे दर कमी झाले असले तरी ७ जूनपासून सुरु झालेली इंधन दरवाढ थांबायचं नाव घेत नाहीये. पेट्रोल आजच्या दिवसात प्रतिलिटर ४७ पैसे, तर डिझेल ५७ पैशांनी महाग झाले आहे. गेल्या दहा दिवसात पेट्रोल एकूण ४ रुपये ५० पैशांनी, तर डिझेल एकूण ५ रुपये ६६ पैशांनी महागले आहे.
लॉकडाऊनच्या काळात इंधनाच्या विक्रीत प्रचंड घट झाली होती. त्यामुळे १६ मार्च ते ५ मे या कालावधीत देशातील पेट्रोल आणि डिझेलचे भाव स्थिर होते. या काळात कच्च्या तेलाच्या किमती मात्र वाढत होत्या. हा तोटा भरुन काढण्यासाठी तेल वितरक कंपन्यांनी आता इंधन दरवाढीचा सपाटा लावला आहे.
