जळगाव-लाईव्ह ट्रेंडस न्यूज प्रतिनिधी । जळगाव शहरातील कांचन नगरात राहणाऱ्या पती-पत्नीमध्ये जेवण मागितल्याच्या कारणावरून झालेल्या वादातून पतीने पत्नीला कानात मारल्याने दुखापत केली. याप्रकरणी शनिपेठ पोलीस ठाण्यात बुधवार २ नोव्हेंबर रोजी सायंकाळी ६ वाजता गुन्हा दाखल करण्यात आला आहे.
याबाबत अधिक माहिती अशी की, जळगाव शहरातील कांचन नगर भागात गणेश पुंडलिक ठाकरे व पौर्णिमा गणेश ठाकरे हे पती-पत्नी वास्तव्याला आहे. १३ ऑक्टोबर रात्री ११.३० वाजता गणेश पुंडलिक ठाकरे यांनी जेवण मागितल्याच्या कारणावरून त्यांच्या पती-पत्नीमध्ये वाद झाला. या वादात रागाच्या भरात गणेश पुंडलिक ठाकरे यांनी पत्नी पौर्णिमा ठाकरे यांच्या कानावर मारून दुखापत केली. याबाबत विवाहितेने बुधवार २ नोव्हेंबर रोजी सायंकाळी ६ वाजता शनिपेठ पोलीस ठाण्यात धाव घेऊन तक्रार दिली. त्यांच्या तक्रारीवरून पती गणेश पुंडलिक ठाकरे यांच्या विरोधात गुन्हा दाखल करण्यात आला आहे. पुढील तपास पोलीस हेडकॉन्स्टेबल प्रशांत देशमुख करीत आहे.
