लंडन वृत्तसंस्था । जगभरात काही देशांकडून कोरोना लस विकसित करण्याचे जोरदार प्रयत्न सुरू असून काहींची तिसऱ्या टप्प्यातील चाचणी सुरू आहे. ब्रिटनमधील ऑक्सफर्ड विद्यापीठातील भारतीय वंशाच्या प्राध्यापक सुमी विश्वास यांनी कोरोनाला अटकाव करणारी एक लस विकसित केली आहे. या लशीची चाचणी ऑस्ट्रेलियासह अनेक देशांमध्ये होत आहे.
प्रा. सुमी विश्वास यांनी २०१७ मध्ये ब्रिटनमध्ये स्पाई बायोटेक नावाची कंपनी स्थापन केली. या कंपनीच्या मुख्य कार्यकारी अधिकारी पदावर त्या कार्यरत आहेत. त्यांनी ऑक्सफर्ड विद्यापीठाच्या जेनर इन्स्टिट्यूटमध्ये एड्रियन हिल आणि सारा गिलबर्ट यांच्यासोबत एकत्र काम केले आहे. या जेनर इन्स्टिट्यूटने एस्ट्राजेनकासोबत लस विकसित केली आहे.
प्रा. सुमी विश्वास यांच्या स्पाई बायोटेकने विकसित केलेल्या लशीची मानवी चाचणी सुरू आहे. सध्या दुसऱ्या टप्प्यातील चाचणी सुरू आहे. ही चाचणी जगातील सर्वात मोठी लस उत्पादक कंपनी असलेल्या भारतातील सिरम इन्स्टिट्यूट ऑफ इंडियाच्यावतीने संचलित केली जात आहे. सिरम इन्स्टिट्यूटसोबत सुमी विश्वास यांच्या स्पाय बायोटेक कंपनीने लस उत्पादनाबाबतचा करार केला आहे.
सध्या लशीच्या मानवी चाचणीसाठी शेकडो स्वयंसेवकांना लस देण्यात आली आहे. लोकांनी चाचणी केंद्रावर जाण्यास सुरुवात केली आहे. ही लस हिपाटायटिस-बी अॅण्टीजनच्या विषाणूसारख्या कणांना वाहक म्हणून वापरते . मानवी शरीरात रोगप्रतिकारक शक्ती विकसित करण्यासाठी कोरोना विषाणू स्पाइक प्रोटीनला ‘सुपरग्लू’ तंत्रज्ञानाने पकडतो.
प्रा. सुमी विश्वास यांचा जन्म कोलकातामधील लेक टाउन भागात झाला. बंगळुरू विद्यापीठातून त्यांनी मायक्रोबॉयोलॉजीमधून शिक्षण पूर्ण केले. त्यांनी ऑक्सफर्ड विद्यापीठातून पीएचडी पूर्ण केली. ऑक्सफर्डच्या जेनर इन्स्टिट्यूटसोबत मलेरियाविरोधातील लस विकसित करण्यासाठी काही वर्ष काम केले आहे.
जागतिक आरोग्य संघटना आणि भारता दरम्यान लशीबाबत चर्चा सुरू आहे. जागतिक आरोग्य संघटनेचे वरिष्ठ सल्लागार ब्रूस आयलवर्ड यांनी ही माहिती दिली. कोवॅक्स फॅसिलिटीचा हिस्सा बनण्यासाठी भारतदेखील पात्र असल्याचे त्यांनी म्हटले. जागतिक आरोग्य संघटना आणि ‘गावी द वॅक्सीन अलायन्स’ या कोवॅक्स फॅसिलिटीचे नेतृत्व करत आहेत. या माध्यमातून जगभरात करोनाला अटकाव करणाऱ्या लस खरेदी करणे आणि त्याच्या लस वितरणात मदत करण्यात येणार आहे.
