नवी दिल्ली । देशातील कोरोनाचा प्रकोप मोठ्या प्रमाणात वाढत असतांना याच्या प्रतिकारासाठी लस हाच उपाय असल्याचे दिसून येत आहे. या अनुषंगाने रशियाने विकसित केलेल्या लसीबाबत भारत सरकार बोलणी करत असल्याची माहिती समोर आली आहे.
भारतात कोरोनाचे रूग्ण वाढत चालले आहेत. शनिवारी कोरोना संसर्ग प्रकरणात भारताने ब्राझीलला मागे टाकले. त्याच वेळी, वाढत्या घटनांमध्ये कोरोना लसीबद्दल एक वाढती बातमी समोर आली आहे. रशियाच्या स्पुतनिक व्ही लसीबाबत मॉस्को आणि नवी दिल्ली यांच्यात चर्चा होत असल्याची माहिती आल्याने याबाबत आशेचा किरण निर्माण झाला आहे.
भारतातील रशियाचे राजदूत निकोले कुडाशिव म्हणाले की, लसीसंदर्भात मॉस्को आणि भारत सरकार यांच्यात अनेक स्तरांवर चर्चा सुरू आहे. त्यामध्ये लस पुरवठा, सह-विकास आणि सहकारी-उत्पादन यासारख्या मुद्द्यांचा समावेश आहे. विशेष म्हणजे रशियाचे अध्यक्ष व्लादिमीर पुतीन यांनी ११ ऑगस्ट रोजी जगातील पहिल्या कोरोना लसीची घोषणा केली आहे. या लसीचे नाव स्पुतनिक व्ही. असे आहे. लॅन्सेट जर्नलच्या मते, सुरुवातीच्या चाचणीत या लसीचे कोणतेही गंभीर दुष्परिणाम समोर आले नाहीत.
मीडिया रिपोर्टनुसार रशियाने लसबाबत भारताशी सहकार्याचे मार्ग सामायिक केले आहेत. सध्या भारत सरकारकडून याचा बारीक अभ्यास केला जात आहे. कुडाशेव म्हणाले की काही आवश्यक तांत्रिक प्रक्रियेनंतर ही लस मोठ्या प्रमाणात (इतर देशांमध्येही) वापरली जाऊ शकते.
येत्या आठवड्यात परराष्ट्रमंत्री एस जयशंकर यांच्या रशिया दौर्‍यादरम्यान कोरोना लसीबाबत चर्चा होईल अशीही चर्चा आहे.
