जळगाव – लाईव्ह ट्रेंड्स न्यूज प्रतिनिधी । भारतीय संस्कृतीतील संगीत आणि कलेचा वारसा जपणाऱ्या ‘युवारंग २०२५’ युवक महोत्सवाने यंदा जळगावात अनोखा उत्साह निर्माण केला. कवयित्री बहिणाबाई चौधरी उत्तर महाराष्ट्र विद्यापीठाच्या विद्यार्थी विकास विभाग व जी.एच.रायसोनी कॉलेज ऑफ इंजिनिअरिंग अँड मॅनेजमेंट, जळगाव यांच्या संयुक्त विद्यमाने या आंतरमहाविद्यालयीन महोत्सवाचे भव्य आयोजन करण्यात आले. राज्याचे वस्त्रोद्योग मंत्री ना. संजय सावकारे यांच्या हस्ते पारितोषिक वितरण सोहळा पार पडला.
मंत्री सावकारे यांनी विद्यार्थ्यांना मार्गदर्शन करताना भारतीय संगीत व कलेच्या जागतिक मूल्यावर भर दिला. युवारंगसारख्या उपक्रमांमुळे तरुणांना स्वतःच्या कलागुणांना वाव देण्यास उत्तम व्यासपीठ मिळते, असे ते म्हणाले. विद्यार्थ्यांनी आत्मविश्वास वाढवत देशहिताचा विचार करत पुढे जावे, असे आवाहन त्यांनी केले. त्यांच्या गायलेल्या “इक प्यार का नगमा है…” यासारख्या गीतांनी क्षणभर वातावरण भावनिक केले.
अभिनेत्री केतकी माटेगावकर यांनी आपल्या अनुभवांतून विद्यार्थ्यांना प्रेरणा दिली. “विश्वास दृढ ठेवा, तोच यशाच्या टक्केवारीत तुम्हाला नेईल” असे त्यांनी सांगितले. त्यांनी बहिणाबाईंच्या कविता आणि ‘टाईमपास’ चित्रपटातील संवाद सादर करत उपस्थितांचे मन जिंकले. खासदार स्मिता वाघ, आमदार सुरेश भोळे, कुलगुरु प्रा. व्ही.एल. माहेश्वरी यांच्यासह अनेक मान्यवर मंचावर उपस्थित होते.
युवास्पार्क २०२५ स्पर्धेमध्ये नवोन्मेष आणि उद्योजकतेला प्रोत्साहन देण्यात आले. एकूण ५० हून अधिक नाविन्यपूर्ण कल्पनांमधून तीन सर्वोत्तम प्रकल्पांना निवडण्यात आले. विजेते प्रकल्प ‘N-Phantom Stealth Coating’, ‘Eco Smart Capsule’ व ‘Tech Gl Supply Chain 5.0’ हे ठरले. विद्यापीठाकडून या संकल्पनांना इनक्युबेशन व आर्थिक सहाय्यही मिळणार असल्याचे कुलगुरूंनी जाहीर केले.
सांगीतिक, नृत्य, वाड्मयीन, रंगमंचीय व ललित कला प्रकारांमध्ये एकंदर ११७ महाविद्यालयांतील १८०० विद्यार्थ्यांनी सहभाग घेतला. विविध स्पर्धांमधून खानदेश कॉलेज एज्युकेशन सोसायटीचे मुळजी जेठा महाविद्यालय, जळगाव हे ‘युवारंग २०२५’ चे सर्वसाधारण विजेते ठरले. चोपड्यातील दादासाहेब डॉ. सुरेश जी. पाटील महाविद्यालय उपविजेता ठरले.
दिव्यांग विद्यार्थ्यांसाठी आयोजिल्या गेलेल्या महोत्सवातही त्यांच्या कलेचे लक्षणीय प्रदर्शन झाले. भारतीय शास्त्रीय गायन, वाद्यसंगीत, वक्तृत्व आणि ललित कला प्रकारांमध्ये त्यांचा सशक्त सहभाग अनुभवता आला. विजेत्या विद्यार्थ्यांना गौरवण्यात आले.
या महोत्सवाचे सूत्रसंचालन प्रा. वीणा महाजन व प्रा. रफिक शेख यांनी केले. आभार कुलसचिव डॉ. विनोद पाटील यांनी मानले. युवारंगमुळे विद्यार्थ्यांमध्ये केवळ कला-प्रतिभा नव्हे तर राष्ट्रभक्ती, सामाजिक बांधिलकी आणि नवोन्मेषी दृष्टिकोनही बळकट झाला, हे स्पष्ट जाणवले.
