Home Cities अमळनेर अमळनेर तालुक्यातील दुष्काळग्रस्तांची घरपट्टी व पाणीपट्टी माफ करा; क्रांतिकारी शेतकरी संघटनेची मागणी

अमळनेर तालुक्यातील दुष्काळग्रस्तांची घरपट्टी व पाणीपट्टी माफ करा; क्रांतिकारी शेतकरी संघटनेची मागणी

0
1

अमळनेर-लाईव्ह ट्रेंड्स न्यूज प्रतिनिधी । तालुक्यात उद्भवलेल्या दुष्काळसदृश परिस्थितीमुळे शेतकरी, शेतमजूर आणि सर्वसामान्य नागरिक मोठ्या आर्थिक संकटात सापडले आहेत. शेतीतून उत्पन्न मिळत नसल्याने आणि ग्रामीण भागातील रोजगाराच्या संधी घटल्याने नागरिकांची आर्थिक घडी पूर्णपणे विस्कटली आहे. या पार्श्वभूमीवर ग्रामपंचायतींमार्फत नागरिकांकडे घरपट्टी व पाणीपट्टी वसुलीसाठी तगादा लावू नये, तसेच दुष्काळग्रस्त नागरिकांची ही संपूर्ण घरपट्टी आणि पाणीपट्टी माफ करण्यात यावी, अशी आग्रही मागणी क्रांतिकारी शेतकरी संघटनेच्या वतीने पंचायत समितीचे गटविकास अधिकारी (BDO) यांना दिलेल्या निवेदनाद्वारे करण्यात आली आहे.

दुष्काळी परिस्थितीमुळे बळीराजाच्या हाताला काम राहिलेले नाही, शेतमजुरांना मजुरी मिळत नाही आणि सर्वसामान्य कुटुंबांना दैनंदिन उदरनिर्वाह करणेही कठीण होऊन बसले आहे. अशा भीषण संकटाच्या काळात स्थानिक ग्रामपंचायतींकडून घरपट्टी व पाणीपट्टी वसुलीसाठी नागरिकांना नोटिसा बजावणे, वसुलीसाठी सक्ती करणे किंवा त्यांना मानसिक त्रास देणे तात्काळ थांबवावे, असे या निवेदनात स्पष्टपणे नमूद करण्यात आले आहे. शासनाने दुष्काळग्रस्त भागातील जनतेला तातडीने दिलासा देण्यासाठी घरपट्टी व पाणीपट्टी माफीचा निर्णय घ्यावा आणि त्याबाबत ग्रामपंचायतींना योग्य ते आदेश द्यावेत, अशी ठाम भूमिका संघटनेच्या पदाधिकाऱ्यांनी मांडली आहे.

या निवेदन देतेवेळी क्रांतिकारी शेतकरी संघटनेचे जिल्हाध्यक्ष शरद विनायक पाटील यांच्या नेतृत्वाखाली ईश्वर उखा पाटील, संदीप सैंदाने, हुमेश पाटील, ॲड. युवराज कोळी, जितेंद्र प्रभाकर काटे, भूषण कोळी, दिलीप पाटील, रवींद्र पाटील आणि राजिक मुजावर आदी पदाधिकारी व कार्यकर्ते मोठ्या संख्येने उपस्थित होते. प्रशासन आणि शासनाने या मागणीची गांभीर्याने दखल घेऊन शेतकरी व कष्टकरी वर्गाला न्याय द्यावा, अशी अपेक्षा यावेळी व्यक्त करण्यात आली.

अमळनेर तालुक्यातील दुष्काळसदृश परिस्थितीमुळे आर्थिक संकटात सापडलेल्या शेतकरी, शेतमजूर व सर्वसामान्य नागरिकांची घरपट्टी आणि पाणीपट्टी पूर्णपणे माफ करावी, तसेच वसुलीसाठी ग्रामपंचायतींकडून लावला जाणारा तगादा थांबवावा, अशी मागणी क्रांतिकारी शेतकरी संघटनेचे जिल्हाध्यक्ष शरद पाटील व पदाधिकाऱ्यांनी गटविकास अधिकाऱ्यांकडे निवेदनाद्वारे केली आहे.

Protected Content

Play sound