पुणे-लाईव्ह ट्रेंडस न्यूज प्रतिनिधी । विश्व मराठी संमेलन २०२५ मध्ये “मराठी भाषा आणि स्त्री साहित्य” या विषयावर झालेल्या विशेष परिसंवादात स्त्री साहित्याच्या भूमिका, संघर्ष आणि बदलत्या दृष्टिकोनावर मार्गदर्शक चर्चा झाली. या परिसंवादात विधानपरिषद उपसभापती डॉ. नीलम गोऱ्हे, मुख्यमंत्री कार्यालयाच्या मुख्य सचिव श्रीमती अश्विनी भिडे आणि लेखिका डॉ. सिसिलिया कार्व्हालो यांनी स्त्री साहित्याच्या विकासाच्या वेगवेगळ्या पैलूंवर प्रकाश टाकला.
डॉ. नीलम गोऱ्हे यांनी स्त्री साहित्याच्या परिवर्तनाचा उल्लेख करताना सांगितले की, पूर्वी स्त्रीचे लिखाण भावनात्मक स्वरूपाचे होते, तर आजची स्त्री स्वतःचे मत व्यक्त करते, सामाजिक प्रश्नांवर भाष्य करते आणि बंडखोरी करते. त्यांनी यावर भर दिला की, साहित्य हे केवळ सौंदर्याची प्रशंसा करणारे नसून, स्त्रियांच्या संघर्षांची, आत्मनिर्भरतेची आणि परिवर्तनाच्या दिशेने होणाऱ्या वाटचालीची जाणीव करून देणारे असले पाहिजे.
डॉ. सिसिलिया कार्व्हालो यांनी स्त्री साहित्यातील बदलांचा उल्लेख करताना सांगितले की, आजची स्त्री आत्मनिर्भर होत आहे आणि समाजात आपले स्थान निर्माण करत आहे. त्यांनी नमूद केले की, पूर्वी स्त्रीच्या भूमिका घरापुरत्या मर्यादित होत्या, तर आता त्या प्रशासन, कुटुंब, प्रेम, समाज आणि व्यवसाय अशा सर्वच क्षेत्रांमध्ये स्वतःचे अस्तित्व निर्माण करत आहेत.
श्रीमती अश्विनी भिडे यांनी स्त्री साहित्याच्या महत्त्वावर भर देत सांगितले की, स्त्री लेखन केवळ भावना मांडणारे नसून, ते सामाजिक वास्तव आणि सशक्तीकरणाचा महत्त्वाचा भाग बनले आहे. त्यांनी स्त्री लेखिकांच्या संघर्षाचा आणि त्यांच्या योगदानाचा गौरव केला. परिसंवादाच्या समारोपात स्त्री साहित्यातील वाढत्या प्रभावावर चर्चा करण्यात आली. स्त्री लेखनाची व्याख्या आता केवळ प्रेमकथांपुरती मर्यादित न राहता, ती सामाजिक प्रश्नांवर भाष्य करणारी आणि पुरुषप्रधान व्यवस्थेला आव्हान देणारी बनली आहे. स्त्री लेखिकांनी निर्भीडपणे लिखाण करून समाजातील वास्तव मांडणे आवश्यक आहे, असे स्पष्ट करण्यात आले.
या परिसंवादातून स्त्री साहित्याच्या महत्त्वाचा आणि मराठी भाषेच्या समृद्धतेसाठी स्त्री लेखिकांच्या योगदानाचा पुन्हा एकदा पाठपुरावा करण्यात आला. स्त्री साहित्याचा प्रवास आणि त्याची भविष्यदृष्टी यावर झालेल्या चर्चेमुळे स्त्री लेखनाच्या दिशेने नवीन दृष्टिकोन प्राप्त झाला आहे.
