पाचोरा-लाईव्ह ट्रेंडस न्यूज प्रतिनिधी | पाचोरा शहरात गस्त घालणाऱ्या पोलिस पथकाने मोठी कारवाई करत २२ लाख रुपयांचा अवैध गुटखा आणि ८ लाख रुपये किमतीचे वाहन जप्त केले आहे. वाहन चालकाला ताब्यात घेतले असून पुढील तपास सुरू आहे.
पोलिसांकडून मिळालेल्या माहितीनुसार, वरखेडी नाका येथे गस्त घालणाऱ्या सहाय्यक पोलीस उपनिरीक्षक दिनेश भदाणे, पो. हे. कॉ. राहुल शिंपी आणि वाहन चालक पो. कॉ. समीर पाटील यांच्या पथकाने भडगावकडून येणारे वाहन (क्रमांक MH-52-0034) थांबवले.
वाहनातील सामग्रीबाबत विचारणा केली असता चालकाने उडवाउडवीची उत्तरे दिली. त्यामुळे संशय बळावल्याने झडती घेतली असता महाराष्ट्रात बंदी असलेला गुटखा मोठ्या प्रमाणावर आढळला. पथकाने गुटख्यासह संबंधित वाहन जप्त करत वाहन चालकाला अटक केली. या कारवाईमुळे अवैध गुटखा वाहतूक आणि साठवणूक करणाऱ्यांमध्ये खळबळ उडाली आहे. पुढील तपास पोलीस करीत आहेत.
