जळगाव-लाईव्ह ट्रेंडस न्यूज प्रतिनिधी । भारत निवडणूक आयोगाच्या निर्देशानुसार २५ जानेवारी 2025 रोजी 15 वा राष्ट्रीय मतदार दिवस संपूर्ण जिल्हाभरात उत्साहात साजरा करण्यात येत आहे. या अनुषंगाने यावर्षीचा राष्ट्रीय मतदार दिवसाचा विषय “नथिंग लाइक व्होटिंग, आय व्होट फॉर शुअर” असा होता, ज्याद्वारे मतदानाचे महत्त्व आणि जनजागृतीवर भर देण्यात आला.
चाळीसगाव मतदार संघात कार्यक्रम :
चाळीसगाव विधानसभा मतदारसंघातील मुख्य कार्यक्रम आर्ट्स, सायन्स आणि कॉमर्स कॉलेज, धुळे रोड येथे पार पडला. यावेळी उपविभागीय अधिकारी प्रमोद हिले, जिल्हा आयकॉन डॉ. मीनाक्षी निकम, तहसीलदार प्रशांत पाटील आणि महाविद्यालयातील विद्यार्थी उपस्थित होते. कार्यक्रमानंतर सर्वांनी राष्ट्रीय मतदार दिनाची शपथ घेतली.
मुक्ताईनगर मतदार संघाची जनजागृती :
मुक्ताईनगर मतदार संघात मतदार जनजागृतीसाठी विविध उपक्रम राबवले गेले. पथनाट्य, वक्तृत्व स्पर्धा आणि रांगोळी स्पर्धा आयोजित करण्यात आल्या. विजेत्यांना बक्षिसे देण्यात आली. या उपक्रमांमुळे मतदारांमध्ये मोठ्या प्रमाणावर जनजागृती झाली.
जामनेर मतदार संघाचा सहभाग :
जामनेर विधानसभा मतदारसंघात राष्ट्रीय मतदार दिवसानिमित्त विशेष कार्यक्रमांचे आयोजन करण्यात आले. उपस्थित मतदारांना शपथ देण्यात आली. मतदार यादी पुनरीक्षण कामकाज उत्कृष्टपणे पूर्ण करणाऱ्या मतदान केंद्रस्तरीय अधिकाऱ्यांचा प्रमाणपत्र देऊन सत्कार करण्यात आला.
रावेर मतदार संघातील विविध स्पर्धा :
रावेर विधानसभा मतदारसंघात व्ही.एस. नाईक महाविद्यालयात सकाळी ९ वाजता मुख्य कार्यक्रम झाला. यावेळी रांगोळी, वक्तृत्व, धावणे आणि पोस्टर तयार करणे यासारख्या स्पर्धांचे आयोजन करण्यात आले. विजेत्या विद्यार्थ्यांना प्रमाणपत्र वितरीत करण्यात आले. मतदान केंद्रस्तरीय अधिकाऱ्यांचा विशेष सत्कार करण्यात आला. कार्यक्रमात मतदार दिनाची शपथ घेऊन मतदानाच्या महत्त्वावर भर देण्यात आला. जिल्ह्यात विविध स्तरांवर साजऱ्या झालेल्या राष्ट्रीय मतदार दिवसाच्या कार्यक्रमांमधून मतदानाचे महत्त्व प्रभावीपणे अधोरेखित झाले. जनजागृतीसाठी राबवलेल्या उपक्रमांनी तरुण पिढीपासून सर्वसामान्यांपर्यंत प्रभाव पाडला.
