चोपडा-लाईव्ह ट्रेंडस न्यूज प्रतिनिधी । चोपडा तालुक्यातील नागलवाडी रोडवरील वराड फाट्याजवळून प्रतिबंधित असलेला गांजाची वाहतूक करणाऱ्या दोन जणांवर चोपडा शहर पोलिसांनी कारवाई केली असून १ लाख ४५ हजार रुपये किमतीचा मुद्देमाल जप्त करण्यात आला आहे. याप्रकरणी चोपडा शहर पोलीस ठाण्यात रात्री ८ वाजता दोन जणांविरोधात गुन्हा दाखल करण्यात आला आहे.

या संदर्भात मिळालेली माहिती अशी की, चोपडा शहरातील नागलवाडी रोडवरील वराड फाट्याजवळून परभणी जिल्ह्यातील दोन जण प्रतिबंधित असलेला गांजाची वाहतूक होत असल्याची गोपनीय माहिती चोपडा शहर पोलीस ठाण्याचे पोलीस निरीक्षक मधुकर साळवे यांना मिळाली. त्यानुसार त्यांनी पथकाला कारवाई करण्याबाबतच्या सूचना दिल्या पथकाने रविवारी रात्री कारवाई करत संशयित आरोपी रोहित संजय शेळके वय-२५ आणि तुळशीराम कचरू आव्हाने (वय-२० दो.राहणार परळीरोड, भीम नगर परभणी) या दोघांना अटक केली आहे. त्यांच्याकडून १ लाख ४५ हजार रुपये किमतीचा १४ किलो ५०० ग्रॅम वजनाचा गांजा जप्त करण्यात आला आहे. याप्रकरणी पोलीस कॉन्स्टेबल गजेंद्र ठाकूर यांनी दिलेल्या फिर्यादीवरून दोघांविरोधात चोपडा शहर पोलीस ठाण्यात गुन्हा दाखल करण्यात आला आहे. या संदर्भात पुढील तपास पोलीस उपनिरीक्षक अनिल भुसारे हे करीत आहे.