धरणगाव-लाईव्ह ट्रेंडस न्यूज प्रतिनिधी । धरणगाव शहरातील मरीमाता मंदीराजवळील कुस्तीच्या मैदानातून एका वृध्दाच्या खिश्यातून २० हजार रूपये किंमतीचे तीन मोबाईल चोरून नेल्याची घटना मंगळवार ३ सप्टेंबर रोजी रात्री ८.३० वाजेच्या सुमारास घडली आहे. याप्रकरणी बुधवारी ४ सप्टेंबर रोजी सकाळी १० वाजता धरणगाव पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.
याबाबत अधिक माहिती अशी की, शेख शकील शेख दगु वय-६८ रा. मित्तल नगर, फैजपूर ता.यावल हे आपल्या परिवारासह वास्तव्याला आहे. धरणगाव शहरातील मरीमाता मंदीराजवळ यात्रोत्सव सुरू आहे. त्यानिमित्ताने शेख शकील शेख दगु हे देखील मरीमातेच्या मंदीराजवळील कुस्ती मैदानात आलेले होते. त्यावेळी त्यांच्या खिश्यातील २० हजार रूपये किंमतीचे तीन मोबाईल अज्ञात चोरट्यांनी चोरून नेले. ही घटना मंगळवारी ३ सप्टेंबर रोजी रात्री साडेआठ वाजता घडली. याबाबत शेख शकील यांनी बुधवारी ४ सप्टेंबर रोजी सकाळी १० वाजता धरणगाव पोलीस ठाण्यात धाव घेवून तक्रार दिली. त्यांनी दिलेल्या तक्रारीवरून अज्ञात चोरट्यांविरोधात गुन्हा दाखल करण्यात आला आहे. पुढील तपास पोलीस नाईक मिलींद भामरे हे करीत आहे.
