सावदा-लाईव्ह ट्रेंड्स न्यूज प्रतिनिधी । रावेर तालुक्यातील गहूखेडा परिसरातील सुदगाव येथे रविवारी दुपारी घडलेल्या घटनेत जाळ्यात अडकलेल्या बिबट्याचा मृत्यू झाल्याची धक्कादायक घटना समोर आली आहे. रानडुकरांना पकडण्यासाठी लावण्यात आलेल्या बेकायदेशीर जाळ्यात हा बिबट्या अडकल्याची माहिती वनविभागाकडून देण्यात आली असून या घटनेमुळे परिसरात मोठी खळबळ उडाली आहे.
वनक्षेत्रपाल श्री. काळे यांनी दिलेल्या माहितीनुसार, रविवारी दुपारी सुमारे तीन वाजेच्या सुमारास सुदगाव येथे एका शेत परिसरात बिबट्या जाळ्यात अडकल्याची माहिती वन विभागाला मिळाली. माहिती मिळताच वन विभागाची संबंधित यंत्रणा तात्काळ घटनास्थळी दाखल झाली. मात्र, घटनास्थळी पोहोचल्यावर बिबट्या मृत अवस्थेत आढळून आला, ज्यामुळे उपस्थितांमध्ये हळहळ व्यक्त करण्यात आली.
तालुक्यातील पशुधन विकास अधिकारी डॉ. स्नेहल मोतेगावकर, डॉ. प्रदीप काळे आणि डॉ. राधा रासवे यांनी घटनास्थळीच प्राथमिक तपासणी करत बिबट्याचे शवविच्छेदन केले. प्रथमदर्शनी तपासणीत बिबट्याच्या शरीरात अत्याधिक प्रमाणात डीहायड्रेशन (निर्जलीकरण) झाल्याचे निदर्शनास आले. जाळ्यात अडकल्यानंतर बराच काळ पाणी न मिळाल्याने त्याचा मृत्यू झाला असावा, असा प्राथमिक अंदाज व्यक्त करण्यात आला आहे.
दरम्यान, मृत्यूचे नेमके कारण स्पष्ट व्हावे यासाठी बिबट्याचा व्हिसेरा नमुना पुढील तपासणीसाठी प्रयोगशाळेत पाठवण्यात आला आहे. प्रयोगशाळेचा अहवाल प्राप्त झाल्यानंतरच मृत्यूमागील अचूक कारण स्पष्ट होणार असल्याचे वन विभागाने सांगितले. या प्रकरणाची वन विभागाने गंभीर दखल घेतली असून बेकायदेशीर जाळे लावणाऱ्यांविरुद्ध कठोर कारवाईचे संकेत देण्यात आले आहेत.
या घटनेमुळे सुदगाव व परिसरात भीती आणि संतापाचे वातावरण निर्माण झाले आहे. वन्यजीव संरक्षणाच्या दृष्टीने ही घटना अत्यंत गंभीर मानली जात असून, नागरिकांनी कोणत्याही वन्यप्राण्यांना इजा होईल असे जाळे किंवा सापळे लावू नयेत, असे आवाहन वन विभागाकडून करण्यात आले आहे. वन्यजीव आणि मानव यांच्यातील संघर्ष टाळण्यासाठी सर्वांनी कायद्याचे पालन करणे आवश्यक असल्याचेही स्पष्ट करण्यात आले आहे.
