चेन्नई-लाईव्ह ट्रेंड्स न्यूज वृत्तसेवा । तामिळनाडूच्या राजकारणात मोठा राजकीय भूकंप घडल्याची चर्चा सुरू असून अभिनेता-राजकारणी Thalapathy Vijay यांच्या तमिळगा वेत्री कळघम (TVK) पक्षाच्या सरकार स्थापनेचा मार्ग अखेर मोकळा झाल्याची माहिती समोर येत आहे. आज सायंकाळी पत्रकार परिषद घेऊन विजय यांच्याकडून याबाबत अधिकृत घोषणा होण्याची शक्यता व्यक्त केली जात आहे.
तामिळनाडू विधानसभा निवडणुकीत यावेळी मोठा उलटफेर पाहायला मिळाला. राज्यातील पारंपरिक राजकीय समीकरणांना धक्का देत TVK ने दमदार कामगिरी केली. M. K. Stalin यांच्या नेतृत्वाखालील डीएमके आणि एआयएडीएमकेसारख्या प्रस्थापित पक्षांना मोठा फटका बसला. विशेष म्हणजे, स्वतः स्टॅलिन यांनाही पराभवाचा सामना करावा लागल्याची चर्चा राजकीय वर्तुळात रंगली आहे.
विधानसभा निवडणुकीत TVK ने तब्बल 108 जागांवर विजय मिळवत सर्वात मोठा पक्ष म्हणून उदय घेतला. मात्र तामिळनाडूमध्ये सत्ता स्थापनेसाठी आवश्यक असलेल्या 118 आमदारांच्या बहुमताच्या आकड्यापासून पक्ष 10 जागांनी दूर होता. त्यानंतर काँग्रेसने TVK ला पाठिंबा जाहीर केला आणि विजय यांच्या समर्थनातील आमदारांची संख्या 112 वर पोहोचली. तरीदेखील सरकार स्थापनेसाठी आणखी सहा आमदारांची गरज कायम होती.
या पार्श्वभूमीवर थलपती विजय यांनी दोन वेळा राज्यपालांची भेट घेऊन सत्ता स्थापनेचा दावा केल्याची माहिती समोर आली होती. मात्र राज्यपालांनी 118 आमदारांच्या सह्यांचे समर्थनपत्र सादर करण्याची अट घातली होती. त्यावेळी TVK कडे प्रत्यक्षात 112 आमदारांचेच समर्थनपत्र असल्याने सरकार स्थापनेबाबत अनिश्चितता निर्माण झाली होती.
मात्र आता हा राजकीय पेच सुटल्याचे संकेत मिळत आहेत. समोर आलेल्या माहितीनुसार, डाव्या पक्षांनी म्हणजेच Communist Party of India (CPI) आणि Communist Party of India (Marxist) (CPM) यांनी TVK ला पाठिंबा देण्याचा निर्णय घेतला आहे. त्यामुळे विजय यांच्या नेतृत्वाखालील आघाडीने बहुमताचा 118 चा आकडा गाठल्याचे सांगितले जात आहे.
आज सायंकाळी चार वाजता होणाऱ्या पत्रकार परिषदेकडे संपूर्ण देशाचे लक्ष लागले असून, विजय सरकार स्थापनेची अधिकृत घोषणा करणार का याबाबत उत्सुकता शिगेला पोहोचली आहे. जर हे घडले, तर तामिळनाडूच्या राजकारणात एका नव्या युगाची सुरुवात मानली जाईल.
