चेन्नई, वृत्तसेवा | लष्कर-ए-तोयबा या दहशतवादी संघटनेचे ६ दहशतवाद्यांनी श्रीलंकामार्गे तामिळनाडूतील कोइम्बतूरमध्ये प्रवेश केल्याची माहिती भारतीय गुप्तचर यंत्रणांना मिळाली आहे. या माहितीनंतर तामिळनाडू राज्यात हाय अॅलर्ट घोषित करण्यात आला आहे.
तामिळनाडूत प्रवेश केलेल्या ६ दहशतवाद्यांमध्ये एक पाकिस्तानी, एक श्रीलंकेतील आणि एक तामीळ दहशतवादी आहे. हे सर्व दहशतवादी मुस्लिम असले तरी त्यांनी हिंदू दिसण्यासाठी तशी वेशभूषा केली आहे. त्यांनी आपल्या कपाळावर टिळा आणि विभूतीही लावली आहे. ही माहिती मिळाल्यानंतर चैन्नई शहरातील सुरक्षेत वाढ करण्यात आली आहे. तसेच महत्त्वाच्या ठिकाणांवर पोलीस कर्मचाऱ्यांची संख्याही वाढवण्यात आली आहे. या व्यतिरिक्त क्यूआरटी टीमही तैनात करण्यात आली आहे. प्रमुख ठिकाणांवर लोकांची तपासणीही करण्यात येत आहे. या दहशतवाद्यांना भारतात प्रवेश करण्यासाठी श्रीलंकेतील काही लोकांनी मदत केल्याची माहितीही गुप्तचर यंत्रणांच्या हाती आली आहे.
