जळगाव – लाईव्ह ट्रेंड्स न्यूज प्रतिनिधी । कवयित्री बहिणाबाई चौधरी उत्तर महाराष्ट्र विद्यापीठ आणि महाराष्ट्र राज्य शिक्षक विकास अकादमी, पुणे यांच्या संयुक्त विद्यमाने आयोजित सहा दिवसीय उच्च श्रेणी उपकरण प्रशिक्षण शिबिराचा समारोप समारंभ मोठ्या उत्साहात पार पडला. या वेळी विद्यापीठाचे कुलगुरू प्रा. व्ही. एल. माहेश्वरी यांनी उपस्थित प्राध्यापकांना संबोधित करताना अध्यापकांनी केवळ पुस्तकी ज्ञानावर न थांबता समाजाच्या गरजा लक्षात घेऊन संशोधन करण्याची गरज असल्याचे सांगितले. त्यांनी स्पष्टपणे नमूद केले की, संशोधन हे समाजोपयोगी आणि परिणामकारक असले पाहिजे.
प्रशिक्षण शिबिरात सहभागी झालेल्या प्राध्यापकांना उच्च दर्जाच्या उपकरणांविषयी सखोल मार्गदर्शन करण्यात आले. या प्रशिक्षणामुळे सहभागी शिक्षकांचे शैक्षणिक आणि संशोधन कार्य अधिक सक्षम होईल, असा विश्वास कुलगुरूंनी व्यक्त केला. विद्यापीठात संशोधन क्षेत्रात सातत्याने नवनवीन उपक्रम राबवले जात असून, गेल्या ३५ वर्षांत या विद्यापीठाने शैक्षणिक क्षेत्रात मोलाची भर घातली असल्याचे त्यांनी नमूद केले.
या समारोप समारंभाच्या मंचावर जैवशास्त्र प्रशाळेचे संचालक प्रा. भूषण चौधरी, पर्यावरण भूशास्त्र प्रशाळेचे संचालक प्रा. एस. एन. पाटील आणि महाराष्ट्र राज्य शिक्षक विकास अकादमीचे वलांजू भार्गव आदी मान्यवर उपस्थित होते. प्रा. भूषण चौधरी यांनी प्रास्ताविक करताना या सहा दिवसांच्या शिबिरात झालेल्या विविध सत्रांची माहिती सादर केली.
महाराष्ट्रातील विविध जिल्ह्यांतील एकूण ४० प्राध्यापकांनी या प्रशिक्षणात सहभाग घेतला. शिबिराच्या समारोप प्रसंगी सर्व सहभागी प्राध्यापकांना प्रमाणपत्रांचे वितरण करण्यात आले. कार्यक्रमाचे सूत्रसंचालन आणि आभार प्रदर्शन प्रा. रक्षा कांकरिया यांनी केले.
या उपक्रमामुळे शिक्षकांच्या व्यावसायिक कौशल्यात वाढ होणार असून, शिक्षण क्षेत्रात गुणवत्ता सुधारण्यास निश्चितच मदत होईल, असा विश्वास सहभागी प्राध्यापकांनी व्यक्त केला.
