मुक्ताईनगर-लाईव्ह ट्रेंडस न्यूज प्रतिनिधी । आपल्या परिसराची जीवनवाहिनी आणि वैभव असलेली पवित्र तापी नदीचा जन्मोत्सव चांगदेव येथे मोठ्या श्रद्धेने साजरा करण्यात आला. नावाडी, शेतकरी बांधव आणि मासेमारी करणारे नागरिक यांच्या वतीने हा उत्सव आयोजित करण्यात आला होता, ज्यामुळे परिसरातील सुजलाम-सुफलाम वातावरणाचे ऋण व्यक्त करण्यात आले.
या खास प्रसंगी, सुरत येथील कपडे व्यापारी बांधवांनी दरवर्षीप्रमाणे तापी नदीसाठी पाठवलेली महाकाय साडी विशेष आकर्षण ठरली. या साडीचे विधिवत पूजन करण्यात आले. त्यानंतर, गावातून तापी-पूर्णा नदी संगम स्थानापर्यंत वाजत-गाजत, भाविक श्रद्धेने पायी चालत गेले.
नदीकाठी पोहोचल्यावर गावकरी मंडळी, महिला, पुरुष आणि युवक यांनी मिळून तापी मातेचे श्रद्धेने पूजन केले आणि आरती गायली. त्यानंतर, सर्व नावाडी बांधवांनी एकत्र येत संगम स्थळी जाऊन साडी-चोळी अर्पण केली. महाप्रसादाचे वाटप करून उपस्थितांनी तापी मातेचा आशीर्वाद घेतला. या वेळी मोठ्या संख्येने ग्रामस्थ उपस्थित होते, ज्यांनी या पवित्र सोहळ्यात सहभाग घेतला.
