जळगाव-लाईव्ह ट्रेंडस न्यूज प्रतिनिधी । जळगाव शहरातील शासकीय वैद्यकीय महाविद्यालय व रुग्णालयात ६४ वर्षीय महिलेवर गुडघे प्रत्यारोपणाची पहिली शस्त्रक्रिया यशस्वीपणे पार पडली आहे. वैद्यकीय पथकाच्या या यशाबद्दल अधिष्ठाता डॉ. गिरीश ठाकूर यांनी अभिनंदन केले आहे.
गेल्या २ वर्षांपासून गुडघेदुखीने त्रस्त असलेल्या या महिलेवर अनेक ठिकाणी उपचार आणि फिजिओथेरपी करूनही आराम मिळत नव्हता. तपासणीअंती त्यांच्यावर गुडघे प्रत्यारोपणाची शस्त्रक्रिया करण्याचा निर्णय घेण्यात आला.
या रुग्णालयात अस्थिव्यंगोपचारशास्त्र विभागात गेल्या ६ महिन्यांत खुबे प्रत्यारोपणाच्या ११ शस्त्रक्रिया यशस्वीपणे पार पडल्या आहेत. तसेच मणक्यांच्या जटील शस्त्रक्रिया अस्थिव्यंगोपचार विभाग आणि द स्पाईन फाउंडेशन मुंबई यांच्या संयुक्त विद्यमाने यशस्वीरित्या पार पाडण्यात आल्या आहेत. ही शस्त्रक्रिया प्राध्यापक व विभाग प्रमुख डॉ. राजकुमार सुर्यवंशी, सहयोगी प्राध्यापक डॉ. राजेंद्र अग्रवाल यांच्या मार्गदर्शनाखाली डॉ. अमोल पाटील, डॉ. निलेश पाटील, डॉ. हनुमंत काळे यांनी यशस्वीपणे पार पाडली.
अधिष्ठाता डॉ. गिरीश ठाकूर यांनी सुपर स्पेशालिटी शस्त्रक्रियेसाठी लागणारी साधनसामग्री व उपकरणे उपलब्ध करून दिली आहेत. शासकीय रुग्णालयात सर्व प्रकारच्या शस्त्रक्रिया करून रुग्णांना योग्य तो उपचार देण्याबाबत सल्ला देण्यात येतो. अस्थिव्यंग उपचारशास्त्र विभागात गुडघे प्रत्यारोपण शस्त्रक्रिया, खुबे प्रत्यारोपण शस्त्रक्रिया, मणक्यांच्या शस्त्रक्रिया, हिप रिप्लेसमेंट, मणक्यांच्या शस्त्रक्रिया या अवघड शस्त्रक्रिया सातत्याने करण्यात येत आहेत. रुग्णांनी या सर्व सोयींचा लाभ घ्यावा, असे आवाहन अधिष्ठाता डॉ. गिरीश ठाकूर यांनी केले आहे.
