जळगाव-लाईव्ह ट्रेंडस न्यूज प्रतिनिधी । तंत्रज्ञान दिवसेंदिवस अधिक स्मार्ट होत असताना आता वेअरेबल गॅझेट्सच्या दुनियेत आणखी एका नव्या डिव्हाईसची भर पडली आहे. स्मार्टफोन, स्मार्टवॉच, स्मार्ट रिंगनंतर आता “स्मार्ट ईअररिंग्स” बाजारात दाखल झाले आहेत. हे नवीन हेल्थ वेअरेबल डिव्हाईस वापरकर्त्यांच्या आरोग्यावर सतत लक्ष ठेवणार असून विशेष म्हणजे यामध्ये कोणताही डिस्प्ले नसल्याने हे पूर्णपणे डिस्ट्रॅक्शन-फ्री अनुभव देते.
अमेरिकन कंपनी Lumia Health ने अलीकडेच “Lumia 2” नावाचे स्मार्ट ईअररिंग लॉन्च केले आहे. दिसायला हे स्टायलिश ईअररिंगसारखे असून प्रत्यक्षात हे एक अत्याधुनिक हेल्थ ट्रॅकिंग डिव्हाईस आहे. कंपनीच्या मते, हे जगातील सर्वात छोटे वेलनेस वेअरेबल उपकरण मानले जात आहे.
या स्मार्ट ईअररिंगमध्ये हार्ट रेट, ब्लड फ्लो, झोप, अ‍ॅक्टिव्हिटी यांसारख्या तब्बल 20 हेल्थ मेट्रिक्स ट्रॅक करण्याची क्षमता आहे. यामध्ये प्रगत हेल्थ सेन्सर्स, प्रोसेसर आणि बॅटरी बसवण्यात आली आहे. एकदा पूर्ण चार्ज केल्यानंतर हे डिव्हाईस तब्बल 7 दिवस चालते.
विशेष म्हणजे हे डिव्हाईस वापरण्यासाठी कान टोचण्याची गरज नसते. सेन्सर कानाच्या मागील भागात बसतो आणि तिथून रक्तवाहिन्यांचे निरीक्षण करतो. त्यामुळे हार्ट रेट आणि ब्लड फ्लोची अचूक माहिती मिळण्यास मदत होते.
स्मार्टवॉचप्रमाणे सतत नोटिफिकेशनचा त्रास या डिव्हाईसमध्ये नाही. कारण यामध्ये डिस्प्लेच देण्यात आलेला नाही. त्यामुळे वापरकर्त्याला केवळ आरोग्य ट्रॅकिंगवर लक्ष केंद्रित करता येते. हे डिव्हाईस काही मिनिटांच्या अंतराने हेल्थ डेटा नोंदवते आणि संबंधित मोबाईल ॲपमध्ये तो पाहता येतो.
विशेषतः ब्लड फ्लो डिसऑर्डर किंवा हृदयाशी संबंधित समस्या असलेल्या रुग्णांसाठी हे डिव्हाईस उपयुक्त ठरू शकते. तसेच फिटनेस आणि हेल्थ मॉनिटरिंगची आवड असलेल्या लोकांसाठीही हे एक नवीन पर्याय ठरणार आहे. सध्या अनेक टेक कंपन्या स्मार्ट ईअररिंग्सवर संशोधन करत असून येत्या काळात या प्रकारच्या वेअरेबल डिव्हाईसची मागणी वाढण्याची शक्यता व्यक्त केली जात आहे.
