जळगाव-लाईव्ह ट्रेंड्स न्यूज प्रतिनिधी । धरणगाव तालुक्यातील पोखरी तांडा येथे श्री स्वामी महाराज सेवा आश्रम मंडळाच्या वतीने यंदाच्या श्रीकृष्ण जन्मोत्सव, भक्तिमय भजन संध्या आणि गोपाळकाला दहीहंडी महोत्सवाचे भव्य आयोजन करण्यात आले आहे. धार्मिक श्रद्धा, भक्ती आणि पारंपरिक उत्साहाचा संगम असलेल्या या सोहळ्यात परिसरातील भाविकांनी सहकुटुंब मोठ्या संख्येने उपस्थित राहून दर्शन व महाप्रसादाचा लाभ घ्यावा, असे आवाहन आयोजकांनी केले आहे.
श्रीकृष्ण जन्मोत्सवानिमित्त शुक्रवार , ४ सप्टेंबर रोजी रात्री ९ ते पहाटे १ वाजेपर्यंत विविध धार्मिक व सांस्कृतिक कार्यक्रमांचे आयोजन करण्यात आले आहे. यामध्ये रात्री ९ ते १२ या वेळेत जळगाव येथील प्रसिद्ध ‘भक्तीनाद’ भजन संध्या ग्रुपच्या वतीने भजन आणि गवळणींची भक्तिमय मैफिल रंगणार आहे. कृष्णभक्तीच्या सुरांनी परिसर भक्तिमय होणार असून भाविकांना या संगीत मैफिलीचा आनंद घेता येणार आहे. या भजन संध्या कार्यक्रमात प्रसिद्ध गायक व कलावंत निलेश पाटील, ‘भक्तीनाद’ ग्रुपचे प्रमुख व निवेदक तुषार वाघुळदे, गायिका वृंदा पालखे, प्रवीण पाटील यांच्यासह अन्य कलाकार सहभागी होणार आहेत. भजन, गवळणी आणि कृष्णभक्तीपर गीतांच्या सादरीकरणामुळे कार्यक्रमाला विशेष रंगत येणार आहे.
रात्री १२ ते १ या वेळेत श्रीकृष्ण जन्म सोहळा पार पडणार आहे. यावेळी भगवान श्रीकृष्णाच्या जन्माचा धार्मिक विधी आणि जयघोषाने परिसर दुमदुमून जाणार आहे. तसेच ‘ॐ नमो भगवते वासुदेवाय नमः स्वाहा’ या मंत्राचा जप करत १०८ आहुतींचा महायज्ञ संपन्न होणार आहे. त्यामुळे जन्माष्टमीच्या निमित्ताने धार्मिक वातावरणात भक्तांना आध्यात्मिक अनुभूती घेता येणार आहे.
यानंतर गुरुवार, ५ सप्टेंबर २०२६ रोजी सायंकाळी ५ ते ७ वाजेपर्यंत गोपाळकाला व दहीहंडी महोत्सवाचे आयोजन करण्यात आले आहे. पारंपरिक पद्धतीने गोपाळकाला साजरा करत दहीहंडी फोडण्याचा जल्लोष करण्यात येणार आहे. या कार्यक्रमामुळे परिसरात उत्साहाचे आणि आनंदाचे वातावरण निर्माण होणार असून, लहानांपासून ज्येष्ठांपर्यंत भाविकांना या सोहळ्याचा आनंद घेता येणार आहे.
हा संपूर्ण धार्मिक व सांस्कृतिक सोहळा श्री गुरुपद परिसर तसेच गुरुसुमंतजी सखाराम दरबार परिसर, पोखरी (जळगाव) येथे आयोजित करण्यात आला आहे. कार्यक्रमाच्या माध्यमातून भक्ती, संस्कृती आणि सामाजिक एकोप्याचा संदेश देण्याचा प्रयत्न करण्यात आला आहे.
श्रीकृष्ण जन्मोत्सव आणि गोपाळकाला दहीहंडी महोत्सवाच्या निमित्ताने भाविकांनी मोठ्या संख्येने उपस्थित राहून धार्मिक कार्यक्रमात सहभागी व्हावे, तसेच श्रीकृष्णाचे दर्शन आणि महाप्रसादाचा लाभ घ्यावा, अशी विनंती श्री स्वामी महाराज सेवा आश्रम मंडळ, पोखरी यांच्या वतीने करण्यात आली आहे.
