पाचोरा-लाईव्ह ट्रेंडस न्यूज प्रतिनिधी | पाचोरा तालुक्यातील एका गावात ३० वर्षीय मतिमंद युवकावर अनैसर्गिक अत्याचार केल्याची धक्कादायक घटना २१ मार्च रोजी सायंकाळी घडली. ६७ वर्षीय वृद्धाने हे कृत्य केल्याचा आरोप असून, या घटनेनंतर तो फरार झाला होता. पोलिसांनी तत्काळ कारवाई करत संशयित आरोपीला अटक केली आहे.
पोलिसांकडून मिळालेल्या माहितीनुसार, पाचोरा तालुक्यातील एका गावातील बसस्थानकाजवळ ३० वर्षीय मतिमंद युवक फिरत होता. याच वेळी गावातील एका वृद्धाने त्याला गोड बोलून गावाजवळील शेतात नेले. तेथे त्याच्यावर अनैसर्गिक अत्याचार केला. ही घटना त्या परिसरात मधमाश्यांचे पोळे काढण्यासाठी गेलेल्या काही युवकांनी पाहिली. त्यांनी तत्काळ हस्तक्षेप करत वृद्धाला पकडण्याचा प्रयत्न केला, मात्र तो घटनास्थळावरून पसार झाला.
पीडित मतिमंद युवकाच्या वडिलांनी त्वरित पाचोरा पोलीस ठाण्यात धाव घेतली आणि संपूर्ण प्रकार पोलिसांना सांगितला. यानंतर घटनास्थळी हजर असलेल्या युवकांनी काढलेले चित्रिकरणही पोलिसांना सुपूर्द केले. पोलिस निरीक्षक अशोक पवार यांनी या घटनेची गंभीर दखल घेत तातडीने पोलीस पथक तयार केले. पोलीस काॅन्स्टेबल संदीप राजपूत आणि वाहन चालक समीर पाटील यांनी सापळा रचून ६७ वर्षीय आरोपीला अटक केली. या अमानुष घटनेमुळे संपूर्ण परिसरात संतापाची लाट उसळली आहे. गावकरी आणि स्थानिक नागरिकांनी आरोपीला कठोर शिक्षा देण्याची मागणी केली आहे. पोलिसांनी आरोपीविरुद्ध गुन्हा दाखल केला असून, पुढील तपास सुरू आहे.
