मुंबई प्रतिनिधी । अजित पवार यांनी महाराष्ट्राच्या पाठीत खंजीर खुपसला असून आपल्या काकांनाही दगा दिला असल्याची जोरदार टीका शिवसेनेचे खासदार संजय राऊत यांनी केला आहे.
आज सकाळी मुख्यमंत्रीपदी देवेंद्र फडणवीस तर उपमुख्यमंत्री म्हणून अजित पवार यांनी शपथ घेतल्याने राज्यात खळबळ उडाली आहे. यानंतर शिवसेनेचे खासदार संजय राऊत यांनी पत्रकार परिषद घेऊन आपली भूमिका स्पष्ट केली. ते म्हणाले की, काल झालेल्या बैठकीत अजित पवार हे आमच्या डोळ्याला डोळे भिडवत नव्हते तेव्हाच आमच्या मनात शंकेची पाल चुकचुकली होती. त्यांची देहबोली ही नकारात्मक वाटत होती. यानंतर आज त्यांनी आज उपमुख्यमंत्रीपदाची शपथ घेतली. त्यांनी महाराष्ट्राच्या पाठीत खंजिर खुपसला असून आपले काका शरद पवार यांना दगा दिला आहे. राज्यातील जनता याचे त्यांना उत्तर देईलच असा दावा राऊत यांनी केला.
दरम्यान, संजय राऊत यांनी भाजवरही टीका केली. ते म्हणाले की, राजभवनाने या संपूर्ण प्रकरणात सत्तेचा वारेमाप गैरवापर केला. ईडीच्या कारवाईचा धाक दाखवून आणि अन्य धमक्या देऊन अजित पवार यांना भाजपने सोबत घेतल्याचा आरोपदेखील त्यांनी केला. अजित पवार आणि भाजपने छत्रपती शिवाजी महाराजांच्या महाराष्ट्राच्या नावाला काळीमा फासला असून जनता त्यांना रस्त्यावर फिरू देणार नसल्याचेही ते म्हणाले.
