चोपडा–लाईव्ह ट्रेंडस न्यूज प्रतिनिधी। महाराष्ट्र शासनाच्या ‘छत्रपती शिवाजी महाराज महाराजस्व समाधान शिबीर अभियान’ अंतर्गत आज चोपडा तालुक्यातील सर्व गावांना एकत्रित महसूल आणि सर्वसमावेशक शासकीय सेवा पुरवण्यासाठी हातेड बुद्रुक येथील राजर्षी शाहू महाराज मंगल कार्यालयात एका भव्य शिबिराचे आयोजन करण्यात आले होते. या शिबिराचे उद्घाटन माजी आमदार प्रा. चंद्रकांत सोनवणे यांच्या हस्ते झाले. यावेळी त्यांनी उपस्थित लाभार्थ्यांशी संवाद साधला आणि त्यांना विविध योजनांचे लाभ व धनादेश प्रदान केले.
मोठा नागरिक सहभाग:
या शिबिरात तब्बल १३०० ते १४०० नागरिकांनी उपस्थिती लावून शासनाच्या विविध योजनांचा लाभ घेतला. शासनाच्या अनेक विभागांनी एकत्रितपणे एकाच छताखाली सेवा उपलब्ध करून दिल्यामुळे ग्रामीण भागातील नागरिकांना प्रशासकीय सुविधा त्यांच्या गावातच सहजपणे मिळाल्या. यामुळे नागरिकांनी प्रशासनाविषयी समाधान आणि सकारात्मक भावना व्यक्त केली.
मान्यवर आणि अधिकारी वर्ग उपस्थित:
याप्रसंगी कृषी उत्पन्न बाजार समिती चोपडा येथील सभापती श्री. नरेंद्र पाटील, पंचायत समितीचे माजी उपसभापती एम. व्ही. पाटील सर, चोपडा येथील माजी उपनगराध्यक्ष विकास पाटील, रावसाहेब पाटील, किरण देवराज, कृषी उत्पन्न बाजार समिती चोपडा येथील संचालक विकी सनेर, वसंत आप्पा बाविस्कर, प्रकाश दादा रजाळे, हातेड बुद्रुकच्या सरपंच प्रेरणा सोनवणे, उपसरपंच रामकृष्ण सनेर, शांताराम बाविस्कर, शितल देवराज आदी मान्यवर उपस्थित होते.
प्रशासकीय अधिकाऱ्यांमध्ये चोपडा तहसीलदार श्री. भाऊसाहेब थोरात, चोपडा ग्रामीण पोलीस स्टेशनचे पोलीस निरीक्षक श्री. अनिल भवारी, गटविकास अधिकारी श्री. अनिल विसावे, सार्वजनिक बांधकाम विभागाचे श्री. वीरेंद्र राजपूत, तालुका आरोग्य अधिकारी डॉ. प्रदीप लासुरकर, निवासी नायब तहसीलदार श्री. योगेश पाटील यांच्यासह महावितरणचे अभियंता, ग्रामीण पाणीपुरवठा विभागाचे अधिकारी आणि सर्व तालुकास्तरीय अधिकारी, कर्मचारी तसेच मंडळ स्तरावरील यंत्रणा उपस्थित होती.
कार्यक्रमाचे सूत्रसंचालन श्री. रमाकांत धनगर आणि स्वप्नील कुलकर्णी यांनी केले. या शिबिरामुळे नागरिकांना मिळालेल्या सोयीबद्दल समाधान व्यक्त होत आहे.
