मुंबई-लाईव्ह ट्रेंडस न्यूज प्रतिनिधी | भोसरी येथील कथित भूखंड गैरव्यवहार प्रकरणात आमदार एकनाथराव खडसे आणि त्यांच्या पत्नी व जावई यांना न्यायालयाने जामीन मंजूर केल्यामुळे त्यांना मोठा दिलासा मिळाल्याचे मानले जात आहे.
एकनाथराव खडसे हे महसूलमंत्री असतांना त्यांच्या पत्नी आणि जावई यांनी भोसरी येथील खरेदी केलेला भूखंड वादाच्या भोवर्‍यात सापडला होता. या प्रकरणामुळे खडसेंना मंत्रीपदाचा राजीनामा द्यावा लागला होता. या प्रकरणी त्यांची इडीने चौकशी देखील केली होती. तर याच प्रकरणात त्यांचे जावई गिरीश दयाराम चौधरी यांना सुमारे दोन वर्ष कारागृहात काढावे लागले होते.
दरम्यान, या कथित भूखंड घोटाळा प्रकरणी ११ ऑक्टोबर २०२३ रोजी आरोपींवर दोषारोपपत्र दाखल करण्यात आले होते. यात २४ नोव्हेंबर २०२३ ला खडसे यांच्यासह दोघांना अंतरिम जामीन मंजूर करण्यात आला होता. यानंतर आता न्यायालयाने अंतरिम जामिनाच्याच अटी -शर्तींवर खडसे यांच्यासह पत्नी मंदाताई खडसे आणि जावई गिरीश दयाराम चौधरी यांना नियमीत जामीन मंजूर केला आहे. यामुळे एकनाथ खडसे आणि त्यांच्या कुटुंबियांना मोठा दिलासा मिळाल्याचे मानले जात आहे.
