रावेर-लाईव्ह ट्रेंडस न्यूज प्रतिनिधी । रावेर शहरात शुक्रवार, ३ ऑक्टोबर रोजी होणाऱ्या दुर्गा विसर्जन मिरवणुकीसाठी पोलिस प्रशासन, महसूल विभाग आणि नगरपालिकेने जय्यत तयारी केली आहे. शहरातील तब्बल २५ दुर्गा मंडळांच्या मूर्ती विसर्जनासाठी ही भव्य मिरवणूक निघणार असून, मिरवणूक मार्गाची पाहणी करून आवश्यक उपाययोजनांना अंतिम रूप देण्यात आले आहे.
मिरवणूक मार्गाची पाहणी:
तहसीलदार बंडू कापसे आणि पोलिस निरीक्षक डॉ. विशाल जयस्वाल यांच्या प्रमुख उपस्थितीत मिरवणुकीच्या संपूर्ण मार्गाची पाहणी करण्यात आली. यावेळी महावितरणचे श्री. ठाकूर, नगरपालिकेचे अधिकारी आणि सार्वजनिक दुर्गा उत्सव मंडळाचे पदाधिकारी उपस्थित होते. मिरवणूक निर्विघ्नपणे पार पडावी यासाठी प्रशासनाने तांत्रिक आणि कायदा-सुव्यवस्थेच्या दृष्टीने विशेष काळजी घेतली आहे.
कायदा व सुव्यवस्थेसाठी कठोर पाऊले:
विसर्जन मिरवणुकीदरम्यान शहरात कोणत्याही प्रकारचा अनुचित प्रकार घडू नये यासाठी पोलिसांनी कडक उपाययोजना केल्या आहेत. कायदा व सुव्यवस्था राखण्यासाठी १२० उपद्रवी व्यक्तींना प्रतिबंधात्मक कारवाई करून शहराबाहेर ठेवण्यात येणार असल्याची माहिती पोलिसांनी दिली आहे. पोलीस निरीक्षक डॉ. विशाल जयस्वाल यांच्या आदेशावरून गोपनीय विभागाचे पो. हे. काँ. हिरालाल गुमळकर, पो. काँ. चैतन्य नारखेडे आणि पो. काँ. रवींद्र भामरे यांनी ही तयारी पूर्ण केली आहे.
वाहतुकीत मोठे बदल आणि आठवडी बाजार बंद:
मिरवणुकीच्या दिवशी शहराच्या वाहतुकीत मोठे बदल करण्यात आले आहेत. विसर्जनाच्या दिवशी मुख्य रस्ता, गांधी चौक आणि मिरवणूक मार्गावर कोणत्याही चारचाकी वाहनांना प्रवेशबंदी करण्यात आली आहे. वाहतूक कोंडी टाळण्यासाठी पंचशील नगरचा मार्ग पर्यायी (बायपास) म्हणून खुला ठेवण्यात आला आहे.
याव्यतिरिक्त, मिरवणुकीसाठी शहर प्रशासनाने नगरपालिकेला रस्ते दुरुस्तीबाबत तात्काळ सूचना दिल्या आहेत, तर महावितरण विभागाला विजेच्या कोणत्याही अडचणी तत्काळ सोडवण्याचे आदेश देण्यात आले आहेत. विशेष म्हणजे, शुक्रवारी होणारी मिरवणूक लक्षात घेऊन, शहराचा आठवडी बाजार शुक्रवार रोजी पूर्णपणे बंद ठेवण्यात आला आहे. बंद बाजार पुन्हा केव्हा भरविण्यात येईल, याबाबत अद्याप आदेश काढण्यात आलेले नाहीत. प्रशासनाच्या या चोख तयारीमुळे यंदाची दुर्गा विसर्जन मिरवणूक निर्विघ्नपणे आणि उत्साहात पार पडेल, असा विश्वास व्यक्त केला जात आहे.
