अमळनेर – लाईव्ह ट्रेंड्स न्यूज प्रतिनिधी । गणेशोत्सव आणि ईद-ए-मिलाद या दोन्ही महत्त्वाच्या सणांच्या पार्श्वभूमीवर अमळनेर उपविभागीय पोलिसांनी शहरात मॉक ड्रिल आणि रूट मार्चचे आयोजन करून कायदा व सुव्यवस्थेचा सज्जतापणा दाखवून दिला. यामागचा उद्देश एकच — कोणताही अनुचित प्रकार घडू न देता, अमळनेर शहरात शांतता आणि सलोखा कायम राखणे. नागरिकांच्या सुरक्षेसाठी पोलीस यंत्रणा किती कटिबद्ध आहे, हे या सरावातून प्रकर्षाने अधोरेखित झाले.
दि. २८ ऑगस्ट २०२५ रोजी सकाळी ९.४५ ते ११.४५ या वेळेत, अमळनेर शहरात पोलीस विभागाच्या संयुक्त सहभागाने हे मॉक ड्रिल आयोजित करण्यात आले. जळगाव पोलीस मुख्यालयातील कवायत निर्देशक यांच्या मार्गदर्शनाखाली तसेच उपविभागीय पोलीस अधिकारी मा. विनायक कोते आणि पोलीस निरीक्षक श्री. दत्तात्रय निकम यांच्या उपस्थितीत डॉ. बाबासाहेब आंबेडकर चौक, गांधलीपुरा परिसरात दंगा काबू योजनेचा (Riot Control) सराव पार पडला. यामध्ये ढाल, लाठी, गॅसगन, शिल्ड, ग्रेनेड यांसह प्रत्यक्ष प्रात्यक्षिक करून सर्व पोलिसांना मार्गदर्शन देण्यात आले.
सरावानंतर अमळनेर शहरातील विविध संवेदनशील भागांमध्ये भव्य रूट मार्च काढण्यात आला. डॉ. बाबासाहेब आंबेडकर चौक, सुभाष चौक, बाजारपेठ, तिरंगा चौक, कुंटे रोड, पवन चौक, झामी चौक, आखाडा मकान, कसाली डीपी, जामा मशीद, सराफ बाजार, दगडी दरवाजा, गुळ बाजार, गांधलीपुरा चौकी अशा ठिकाणी पोलीस अधिकाऱ्यांनी आणि अंमलदारांनी नागरिकांमध्ये विश्वास निर्माण करणारा शांततेचा संदेश दिला.
या रूट मार्चमध्ये अमळनेर पोलीस स्टेशनमधील ४ अधिकारी व ३६ अंमलदार, मारवड पोलीस स्टेशनचे १ अधिकारी व ११ अंमलदार, पारोळा पोलीस स्टेशनचे १० अंमलदार, एरंडोल पोलीस स्टेशनचे ७ अंमलदार, दंगा नियंत्रण पथक, स्ट्रायकिंग फोर्स आणि ६२ होमगार्ड यांचा समावेश होता. एकूण सहभागातून पोलीस यंत्रणेची सज्जता व संघटित प्रयत्न स्पष्ट दिसून आले.
या सराव आणि रूट मार्चमुळे नागरिकांमध्ये विश्वास निर्माण झाला असून, कायदा-सुव्यवस्थेच्या बाबतीत पोलिसांवरचा विश्वास दृढ झाला आहे. शहरातील नागरिकांनी या उपक्रमाला सकारात्मक प्रतिसाद दिला आणि पोलिसांचे कौतुक करत शांततेच्या या प्रयत्नाला पाठिंबा दिला.
