जळगाव-लाईव्ह ट्रेंडस न्यूज प्रतिनिधी | दीपावली भाऊबीज निमित्ताने एसटी महामंडळाच्या बसेस मध्ये प्रवाशांची संख्या वाढलेली आहे. बहिणी आपल्या भावांना भेटण्यासाठी लालपरीत गर्दी करताना दिसत आहेत. या अनुषंगाने प्रवाशांचां प्रवास सुखाचा होण्यासाठी एसटी महामंडळाने प्रवासी मित्र ही संकल्पना राबवली आहे.
या संकल्पनेनुसार शहरातील महत्त्वपूर्ण थांब्यांवर एसटी कर्मचाऱ्यांची नियुक्ती करण्यात आलेली असून प्रत्येक येणाऱ्या व जाणाऱ्या बसेस मध्ये प्रवाशांची चढउतार करण्यासाठी मदत करण्याचे काम हे प्रवासी मित्र करीत असतात. त्याचप्रमाणे सदर थांब्यावर ट्रॅफिक जाम होऊ नये यासाठी देखील मोठ्या प्रमाणावर मदत होत असते.
जळगाव शहरातील प्रत्येक बस स्टॉप वर एसटी कर्मचारी हे प्रवासी मित्राच्या रूपात दिसून येत आहेत. शिवकॉलनी थांब्यावर एसटी कर्मचारी गोपाळ पाटील प्रवाशांना सहकार्य करताना दिसून आलेत. “प्रवासी मित्र या संकल्पनेमुळे प्रवाशांचां प्रवास अगदी सोपा झालेला आहे, अनावश्यक गर्दी, चेंगराचेंगरी किंवा वाहतूक विस्कळीत होण्यासारखे प्रकार थांबलेले आहेत. साहजिकच एसटीच्या लोकप्रियतेत भर देखील पडलेली आहे” असे एसटी कर्मचारी गोपाळ पाटील यांनी सांगितले.
