पारोळा-लाईव्ह ट्रेंड्स न्यूज प्रतिनिधी । आमदार ॲड. अमोल पाटील यांच्या संकल्पनेतून पारोळा शहरातील एन.एस. हायस्कूलच्या मैदानावर आयोजित करण्यात आलेला ‘आमदार दहीहंडी सोहळा’ अभूतपूर्व उत्साह, थरार आणि हजारो नागरिकांच्या उत्स्फूर्त सहभागाने दिमाखात पार पडला. एरंडोल विधानसभा मतदारसंघात पहिल्यांदाच एवढ्या भव्य स्वरूपात आयोजित करण्यात आलेल्या या सोहळ्याला नागरिकांनी तुफान प्रतिसाद दिला. मैदानात उभे राहण्यासाठीही जागा अपुरी पडावी, असा जनसागर या सोहळ्यासाठी लोटला होता.
मुंबई आणि पुण्यासारख्या महानगरांमध्ये पाहायला मिळणाऱ्या भव्य दहीहंडी सोहळ्याचा थरार पारोळ्यासह ग्रामीण भागातील गोरगरीब, कष्टकरी, सर्वसामान्य नागरिक आणि युवकांना अनुभवता यावा, या उद्देशाने या कार्यक्रमाचे आयोजन करण्यात आले होते. त्यामुळे पारोळा शहरासह एरंडोल, भडगाव आणि संपूर्ण विधानसभा मतदारसंघातील विविध गावांमधून नागरिक मोठ्या संख्येने एन.एस. हायस्कूलच्या मैदानावर दाखल झाले.
गोविंदा पथकांच्या थरारक सादरीकरणाने संपूर्ण मैदान दणाणून गेले. एकापाठोपाठ एक मानवी थर रचत गोविंदांनी उपस्थितांच्या काळजाचा ठोका चुकविला. विशेष म्हणजे तब्बल सात थरांचा मानवी मनोरा उभारून गोविंदा पथकांनी दहीहंडीला सलामी दिली. जिद्द, एकजूट, समन्वय आणि धाडसाचे दर्शन घडविणाऱ्या या सादरीकरणाला उपस्थित हजारो नागरिकांनी टाळ्यांचा कडकडाट करत दाद दिली. ‘गोविंदा आला रे आला’च्या जयघोषाने संपूर्ण परिसर भारावून गेला.
अटीतटीच्या आणि चुरशीच्या दहीहंडी स्पर्धेत महात्मा फुले मित्र मंडळ, रावेर या गोविंदा पथकाने दमदार कामगिरी करत तब्बल सात थरांचा मनोरा उभारला. या शानदार कामगिरीच्या जोरावर रावेरच्या पथकाने प्रथम क्रमांक पटकावत १ लाख ५१ हजार रुपयांचे मानाचे पारितोषिक आपल्या नावे केले. सात थरांचा मनोरा उभारत मिळविलेला हा विजय सोहळ्याचे प्रमुख आकर्षण ठरला.
स्पर्धेत श्रीकृष्ण बहुउद्देशीय संस्था, जळगाव यांनी द्वितीय क्रमांक पटकावत ३१ हजार रुपयांचे पारितोषिक मिळविले. तर गोपाळपुरा मित्र मंडळ, जळगाव यांनी तृतीय क्रमांक मिळवत ११ हजार रुपयांचे पारितोषिक पटकावले. सात थरांवर सलामी देणाऱ्या गोविंदा पथकांचाही यावेळी विशेष गौरव करण्यात आला.
भव्य विद्युत रोषणाई, आकर्षक साऊंड शो, गोविंदा पथकांचे थरारक सादरीकरण आणि हजारो नागरिकांचा उत्स्फूर्त सहभाग यामुळे एन.एस. हायस्कूलचे मैदान अक्षरशः जल्लोषाने दुमदुमून गेले होते. महिला, युवक, ज्येष्ठ नागरिक आणि बालगोपालांनीही या सोहळ्याचा मनमुराद आनंद लुटला. पारोळा शहरात सणासुदीचे आणि उत्सवाचे वातावरण निर्माण झाले होते.
यावेळी उपस्थित जनसागराला संबोधित करताना आमदार ॲड. अमोल पाटील यांनी नागरिकांच्या अलोट प्रेमाबद्दल आणि उत्स्फूर्त प्रतिसादाबद्दल आभार व्यक्त केले. जनतेच्या प्रेमाला दंडवत करत त्यांनी या आयोजनाला मिळालेल्या प्रतिसादाबद्दल कृतज्ञता व्यक्त केली. दहीहंडी हा केवळ मनोरंजनाचा कार्यक्रम न राहता त्यातून युवकांना सकारात्मक दिशा देण्याचा आणि समाजाला विधायक संदेश देण्याचा प्रयत्न असल्याचे त्यांनी सांगितले.
युवकांनी व्यसनांपासून दूर राहावे, आपल्या ऊर्जेचा उपयोग सकारात्मक व विधायक कार्यासाठी करावा तसेच क्रीडा आणि संस्कृतीशी जोडले जावे, असे आवाहन आमदार अमोल पाटील यांनी केले. यासोबतच एरंडोल विधानसभा मतदारसंघाच्या सर्वांगीण विकासाची दिशा आणि मतदारसंघात सुरू असलेल्या विविध विकासकामांबाबतही त्यांनी भाष्य केले.
या भव्य सोहळ्यास नगरपरिषदेचे अध्यक्ष, उपाध्यक्ष, नगरसेवक-नगरसेविका, विविध स्थानिक स्वराज्य संस्थांचे आजी-माजी पदाधिकारी व सदस्य, शिवसेना व युवासेनेचे आजी-माजी पदाधिकारी, शिवसैनिक, युवासैनिक, विविध गावांतून आलेले नागरिक, गोविंदा पथके, माता-भगिनी आणि हजारो शहरवासीय उपस्थित होते.
सात थरांचा थरार, रावेरच्या गोविंदा पथकाचा मानाचा बहुमान, हजारो नागरिकांचा अभूतपूर्व जल्लोष आणि आमदार अमोल पाटील यांच्या संकल्पनेला मिळालेली जनतेची तुफान साथ यामुळे ‘आमदार दहीहंडी सोहळा’ हा केवळ उत्सव न राहता एरंडोल विधानसभा मतदारसंघातील भव्य जनसोहळा ठरला. पारोळ्याच्या सांस्कृतिक आणि सामाजिक जीवनात या आयोजनाने वेगळा ठसा उमटवला असून, या भव्य दहीहंडी सोहळ्याची चर्चा संपूर्ण मतदारसंघात रंगली आहे.
पारोळ्यातील ‘आमदार दहीहंडी’मध्ये सात थरांची थरारक सलामी देत रावेरच्या महात्मा फुले मित्र मंडळाने प्रथम क्रमांक पटकावला आणि १ लाख ५१ हजार रुपयांचे पारितोषिक मिळविले. हजारो नागरिकांच्या उपस्थितीत झालेल्या या सोहळ्यामुळे पारोळा शहर जल्लोषात न्हाऊन निघाले.
