जळगाव लाईव्ह ट्रेंडस न्यूज प्रतिनिधी । जळगाव एमआयडीसी परिसरात घडलेल्या धाडसी चोरीचा एमआयडीसी पोलिसांनी अवघ्या ४८ तासांत पर्दाफाश केला आहे. २५ मार्च रोजी श्री प्रभू डिस्ट्रीब्युटर्सच्या गोडाऊनमध्ये झालेल्या चोरीप्रकरणी पोलिसांनी चार जणांना अटक केली असून त्यांच्याकडून ८ लाख ३५ हजारांचा मुद्देमाल जप्त करण्यात आला आहे. विशेष म्हणजे, या चोरीचा मास्टरमाइंड गोडाऊनमध्ये मागील १० वर्षांपासून काम करणारा कर्मचारीच असल्याची धक्कादायक माहिती समोर आली आहे.
जळगाव एमआयडीसी परिसरात अतुल मुळे यांच्या मालकीच्या गोडाऊन आहे. या गोडावूनमधून चोरट्यांनी ८ लाख ३५ हजार रुपये किमतीच्या पापड मसाल्याच्या ७१ गोण्या आणि दोन इको गाड्या चोरून नेल्या होत्या. या घटनेनंतर एमआयडीसी पोलिसांनी तातडीने तपास सुरू केला. परिसरातील सीसीटीव्ही फुटेजची पाहणी केली असता, गोडाऊनमधील चालक अनिल पाटील याने आपल्या साथीदारांच्या मदतीने ही चोरी केल्याचे उघडकीस आले.
एमआयडीसी पोलीस ठाण्याचे पोलीस निरीक्षक संदीप पाटील यांनी पथकाला अटक करण्याच्या सुचना दिल्या. त्यानुसार पोलिसांनी संशयित आरोपी अनिल पाटील, बाबुराव सुरवाडे, शिवा पाटील आणि राहुल बाविस्कर यांना अटक केली आहे. या चौघांनाही न्यायालयात हजर केले असता, न्यायालयाने त्यांना पोलीस कोठडी सुनावली आहे. या चोरीमागील नेमके कारण काय होते, याचा तपास पोलीस करत आहेत. या चोरीप्रकरणी एमआयडीसी पोलिसांनी दाखवलेल्या तत्परतेचे सर्वत्र कौतुक होत आहे. अवघ्या ४८ तासांत चोरट्यांना अटक करून पोलिसांनी गुन्ह्याचा पर्दाफाश केला आहे.
