रायपूर-लाईव्ह ट्रेंड्स न्यूज प्रतिनिधी । रायपूर येथील मयुरेश्वर इंग्लिश मीडियम स्कूलमध्ये ‘ऋतू विशेष रानभाजी महोत्सव’ उत्साहपूर्ण वातावरणात साजरा करण्यात आला. या उपक्रमातून विद्यार्थ्यांनी शेतकरी वेशभूषा परिधान करून विविध रानभाज्यांची माहिती सादर केली, तर रानभाज्यांचे पौष्टिक मूल्य, आरोग्यदायी फायदे आणि पारंपरिक आहाराचे महत्त्व पालक व विद्यार्थ्यांसमोर प्रभावीपणे मांडण्यात आले.
महोत्सवात विद्यार्थ्यांनी आकर्षक शेतकरी वेशभूषेत सहभागी होत विविध रानभाज्यांची ओळख करून दिली. यावेळी ग्रामदेवतेचा सजीव देखावा आणि रानमेळाव्याची सुंदर संकल्पना साकारण्यात आली. विविध माहितीपर फलकांच्या माध्यमातून रानभाज्यांचे प्रकार, त्यांचे औषधी गुणधर्म आणि दैनंदिन आहारातील महत्त्व याविषयी उपस्थितांना माहिती देण्यात आली. यावेळी मार्गदर्शन करताना सौ. भारती परदेशी यांनी रानभाज्यांचे आरोग्यदायी महत्त्व सविस्तरपणे विशद केले. त्यांनी सांगितले की, रानभाज्या या निसर्गात कोणत्याही रासायनिक खतांशिवाय किंवा कीटकनाशकांशिवाय नैसर्गिकरीत्या उगवणाऱ्या सेंद्रिय भाज्या आहेत. जीवनसत्त्वे, खनिजे, अँटी-ऑक्सिडंट्स आणि फायबरने समृद्ध असलेल्या या भाज्या रोगप्रतिकारशक्ती वाढविण्यास, पचनक्रिया सुधारण्यास, वजन नियंत्रणात ठेवण्यास, रक्तातील साखरेची पातळी संतुलित राखण्यास तसेच रक्तशुद्धी आणि त्वचेच्या आरोग्यासाठी उपयुक्त ठरतात. त्यांनी कर्टुले (कंटोला), तांदुळजा, माठ, अळूची पाने, कुडाची फुले, घाणेरी, चिवळ आणि आंबटी यांसारख्या महाराष्ट्रातील प्रमुख रानभाज्यांचे औषधी गुणधर्मही उपस्थितांना सांगितले. विशेषतः मधुमेह, रक्तक्षय, पचनविकार आणि रोगप्रतिकारशक्ती वाढविण्यासाठी या भाज्यांचा आहारात समावेश करण्याचा सल्ला त्यांनी दिला.
रानभाज्यांचा वापर करताना योग्य ओळख असलेल्या व्यक्तीच्या मार्गदर्शनाखालीच त्यांची निवड करावी, भाज्या स्वच्छ धुवाव्यात आणि त्यांचे पौष्टिक मूल्य टिकून राहण्यासाठी कमी वेळ शिजवाव्यात, अशा महत्त्वपूर्ण सूचनाही त्यांनी दिल्या. या उपक्रमाला पालकांचा उत्स्फूर्त प्रतिसाद लाभला. विद्यार्थ्यांनी सादर केलेल्या माहितीमुळे आणि रानभाजी प्रदर्शनामुळे उपस्थितांना पारंपरिक व पौष्टिक आहाराचे महत्त्व नव्याने समजले. आधुनिक जीवनशैलीत दुर्लक्षित होत चाललेल्या रानभाज्यांचे संवर्धन आणि त्यांच्या सेवनाबाबत जनजागृती करण्याचा हा उपक्रम प्रभावी ठरला.
कार्यक्रमाच्या यशस्वी आयोजनासाठी सौ. सोनाली देसले मॅडम आणि सौ. मयुरी वाघ मॅडम यांनी विशेष परिश्रम घेतले. शाळेच्या या उपक्रमाचे पालक व उपस्थितांनी कौतुक करत विद्यार्थ्यांच्या सादरीकरणाला भरभरून दाद दिली. एकूणच, मयुरेश्वर इंग्लिश मीडियम स्कूलमध्ये आयोजित ‘ऋतू विशेष रानभाजी महोत्सव’ हा विद्यार्थ्यांमध्ये निसर्ग, आरोग्य आणि पारंपरिक आहाराविषयी जागरूकता निर्माण करणारा उपक्रम ठरला. रानभाज्यांचे महत्त्व भावी पिढीपर्यंत पोहोचविण्याचा शाळेचा हा प्रयत्न निश्चितच कौतुकास्पद असल्याचे उपस्थितांनी मत व्यक्त केले.
