जळगाव-लाईव्ह ट्रेंडस न्यूज प्रतिनिधी । अमळनेर येथे ८ व ९ फेब्रुवारी २०२५ रोजी भव्य ‘जळगाव ग्रंथोत्सव २०२५’ चे आयोजन करण्यात आले आहे. महाराष्ट्र शासनाच्या उच्च व तंत्रशिक्षण विभागांतर्गत ग्रंथालय संचालनालय, जळगाव जिल्हा ग्रंथालय अधिकारी कार्यालय आणि पूज्य साने गुरुजी ग्रंथालय व मोफत वाचनालय, अमळनेर यांच्या संयुक्त विद्यमाने टाऊन हॉलच्या भव्य पटांगणावर हा ग्रंथोत्सव पार पडणार आहे.
भव्य ग्रंथदिंडीने सुरुवात
शनिवार ८ फेब्रुवारी रोजी सकाळी ९ वाजता ग्रंथदिंडीचे आयोजन करण्यात आले आहे. ह.भ.प. पू. श्री प्रसाद महाराज यांच्या शुभ आशीर्वादाने आणि मुख्याधिकारी तुषार नेरकर, उपशिक्षणाधिकारी एफ. ए. पठान व गटशिक्षणाधिकारी रावसाहेब मांगो पाटील यांच्या प्रमुख उपस्थितीत आमदार अनिल भाईदास पाटील यांच्या हस्ते ग्रंथदिंडीचे पूजन होणार आहे.
उद्घाटन सोहळा व प्रमुख मान्यवर
११ वाजता ग्रंथोत्सवाचे उद्घाटन जलसंपदा मंत्री गिरीश महाजन यांच्या हस्ते होणार आहे.
अध्यक्षस्थान: केंद्रीय राज्यमंत्री क्रीडा व युवक कल्याण विभाग रक्षाताई खडसे भूषवणार आहेत.
प्रमुख अतिथी: पालकमंत्री गुलाबराव पाटील, वस्त्रोद्योगमंत्री संजय सावकारे, खासदार स्मिताताई वाघ, तसेच जळगाव जिल्ह्यातील विधान परिषद व विधानसभा सदस्य, जिल्हाधिकारी आयुष प्रसाद व ग्रंथालय संचालक अशोक गाडेकर उपस्थित राहणार आहेत.
पहिल्या दिवसाचे विशेष कार्यक्रम:
दुपारी ३ वाजता: ‘अहिराणी वैभव’ या विषयावर डॉ. एस. के. पाटील (मालेगाव दाभाडी) यांचे प्रबोधनात्मक अहिराणी प्रवचन.
सायंकाळी ५ वाजता: मयूर देशमुख (नाशिक) आणि सहकाऱ्यांचे “महाराष्ट्रातील थोर संतांच्या जीवनावरील संगीतमय भारूड.”
दुसऱ्या दिवशी (९ फेब्रुवारी) विशेष आकर्षण:
सकाळी: प्राध्यापक महेंद्र गणपुले, नारायणगाव (पुणे) यांचा ‘हास्यनगरी’ हा बहारदार कार्यक्रम.
दुपारी: ‘कृत्रिम बुद्धिमत्तेच्या दिशेने ग्रंथालयाची वाटचाल’ या विषयावर जळगाव महाविद्यालयाचे ग्रंथपाल हितेश ब्रिजवासी यांचे व्याख्यान.
त्यानंतर आदिवासी विकास आयुक्तालयाचे सहआयुक्त कपिल पवार यांचे व्याख्यान आणि साहित्यिक व दीर्घकाळ सेवा देणाऱ्या ग्रंथपालांचा सत्कार होणार आहे.
या ग्रंथोत्सवात अनेक प्रकाशनांचे स्टॉल प्रदर्शन व विक्रीसाठी उभारण्यात येणार आहेत. सर्वांसाठी प्रवेश विनामूल्य आहे. जिल्हा ग्रंथालय अधिकारी सुहास रोकडे, जिल्हा ग्रंथालय संघ, अमळनेर तालुका ग्रंथालय संघ आणि पूज्य साने गुरुजी ग्रंथालय व मोफत वाचनालयाचे दिलीप सोनवणे, चिटणीस प्रकाश वाघ यांनी सर्व वाचक, साहित्यप्रेमी व ग्रंथप्रेमींनी मोठ्या संख्येने उपस्थित राहण्याचे आवाहन केले आहे.
