मुक्ताईनगर-लाईव्ह ट्रेंडस न्यूज प्रतिनिधी । जामनेर येथून मुक्ताईनगरकडे येणाऱ्या मुक्ताईनगर आगाराच्या बसला सारोळा फाट्याजवळ अपघात झाला असून यात दहा प्रवासी जखमी झाले आहेत.
या संदर्भात एसटी परिवहन खात्याच्या मुक्ताईनगर आगाराची बस ही जामनेरवरून मुक्ताईनगर येथे येत होती. सायंकाळी साडेसात वाजेच्या सुमारास सारोळा फाट्याजवळ एका झाडाला एसटीने जोरदार धडक दिली. या अपघातात गाडाचा चालक आणि वाहकासह दहा प्रवासी जखमी झाले असून यात दोन प्रवाशांची प्रकृती गंभीर आहे.
अपघातात जखमी झालेल्या प्रवाशांना मुक्ताईनगरच्या उपजिल्हा रूग्णालयात दाखल करण्यात आले. यातील दोघांना जळगाव येथील रूग्णालयात पाठविण्यात आले आहे. अपघाताची माहिती मिळताच आमदार चंद्रकांत पाटील यांनी घटनास्थळी धाव घेऊन जखमींची विचारपूस केली. त्यांनी रूग्णांना उपचारासाठी जळगावला पाठविण्याची मदत केली. तर पोलीसांनी देखील घटनास्थळी धाव घेत मदतकार्य केले.
