यावल-लाईव्ह ट्रेंड्स न्यूज प्रतिनिधी । यावल शहरातील बोरावल गेट, डॉ. बाबासाहेब आंबेडकर नगरासह विविध परिसरांतील नागरी समस्यांबाबत आमदार अमोल हरिभाऊ जावळे यांनी सकारात्मक प्रतिसाद दिल्याची माहिती भाजपाच्या गटनेत्या तथा नगरसेवक नंदाताई राजेंद्र महाजन यांनी दिली. नागरिकांच्या अडचणी जाणून घेत त्या प्रशासनाच्या माध्यमातून सोडविण्यासाठी प्रयत्न करण्याची भूमिका यावेळी मांडण्यात आली.
रावेर-यावल मतदारसंघाचे आमदार अमोल हरिभाऊ जावळे यांच्या मार्गदर्शनाखाली माजी जिल्हा परिषद सदस्य सविता अतुल भालेराव आणि नगरसेवक तथा भाजपाच्या गटनेत्या नंदाताई राजेंद्र महाजन यांनी परिसरातील नागरिकांच्या, विशेषतः महिलांच्या विविध समस्या जाणून घेतल्या. या समस्या आमदार जावळे यांच्यासमोर मांडण्यात आल्या. यावल नगरपालिकेच्या हद्दीतील नागरिकांना रस्ते, पाणीपुरवठा, गटारी, वीज, आरोग्य, शिक्षण आणि स्वच्छता यांसारख्या मूलभूत सुविधांशी संबंधित विविध अडचणींचा सामना करावा लागत असल्याचे यावेळी निदर्शनास आणून देण्यात आले. तसेच शासकीय योजनांचा लाभ, महिलांच्या समस्या, सर्वसामान्य नागरिक व ज्येष्ठ नागरिकांच्या अडचणी आणि तरुणांसाठी रोजगार व कौशल्यविकासाच्या संधी उपलब्ध करून देण्याच्या विषयावरही चर्चा करण्यात आली. नागरी समस्या केवळ ऐकून घेण्यापेक्षा त्या सोडविण्यासाठी प्रशासनाकडे सातत्याने पाठपुरावा करणे आवश्यक असल्याचे यावेळी सांगण्यात आले. नागरिकांच्या प्रश्नांबाबत आमदार अमोल जावळे यांनी सकारात्मक प्रतिसाद देत संबंधित विषयांवर आवश्यक ती कार्यवाही करण्याची भूमिका व्यक्त केली.
महिलांच्या विविध अडचणींकडे विशेष लक्ष देण्याची गरज असल्याचेही यावेळी नमूद करण्यात आले. माता-भगिनींच्या समस्या समजून घेणे, पात्र महिलांना आणि गरजू कुटुंबांना शासकीय योजनांचा लाभ मिळवून देण्यासाठी मार्गदर्शन करणे तसेच त्यांच्या अडचणी प्रशासनापर्यंत पोहोचविणे, ही लोकप्रतिनिधी आणि सामाजिक कार्यकर्त्यांची महत्त्वाची जबाबदारी असल्याचे मत व्यक्त करण्यात आले. यावल शहरातील विविध भागांमध्ये मूलभूत सुविधांचा विकास होण्यासाठी स्थानिक नागरिक, लोकप्रतिनिधी आणि प्रशासन यांच्यात समन्वय आवश्यक आहे. नागरिकांच्या समस्या प्रत्यक्ष जाणून घेऊन त्यावर तोडगा काढण्यासाठी पाठपुरावा केल्यास अनेक प्रश्न मार्गी लागू शकतात, अशी अपेक्षा व्यक्त करण्यात आली.
दरम्यान, लोकप्रतिनिधीचे पद किती मोठे आहे यापेक्षा जनतेच्या अडचणीच्या काळात केलेले काम आणि नागरिकांच्या मनात निर्माण झालेला विश्वास अधिक महत्त्वाचा असतो, अशी भूमिका नंदाताई महाजन यांनी व्यक्त केली. लोकांच्या प्रश्नांसाठी सातत्याने प्रयत्न करणाऱ्या लोकप्रतिनिधींना नागरिकांचा पाठिंबा मिळतो, असेही त्यांनी नमूद केले. यावल शहराचा सर्वांगीण विकास, सर्वसामान्य नागरिकांचा सन्मान आणि प्रत्येक कुटुंबाच्या अडचणी सोडविण्यासाठी सामूहिक प्रयत्नांची गरज असल्याचे यावेळी सांगण्यात आले. बोरावल गेट, डॉ. बाबासाहेब आंबेडकर नगरासह शहरातील विविध भागांतील नागरी प्रश्नांवर आमदार अमोल जावळे यांनी सकारात्मक प्रतिसाद दिल्याने नागरिकांच्या अपेक्षा वाढल्या आहेत.
