जळगाव लाईव्ह ट्रेंडस न्यूज प्रतिनिधी । पाचोरा येथे राहणाऱ्या गव्हर्मेंट कॉन्ट्रॅक्टरला गेमिंग वेबसाईटवरून गेम खेळून मोठ्या प्रमाणावर पैसे जिंकू शकता असे आमिष दाखवून त्यांच्याकडून वेळोवेळी ऑनलाईन पद्धतीने तब्बल ७८ लाख ९० हजार ५०० रुपये घेऊन ऑनलाईन फसवणूक केल्याची धक्कादायक बाब समोर आले आहे. या प्रकरणी रविवारी १९ जानेवारी रोजी दुपारी १ वाजता जळगाव सायबर पोलीस ठाण्यात फसवणुकीचा गुन्हा दाखल करण्यात आला आहे.

यासंदर्भात मिळालेली माहिती अशी की, जळगाव जिल्ह्यातील पाचोरा येथे रोशन पदमसिंह पाटील वय-२७, रा. पाचोरा हे आपल्या परिवारासह वास्तव्याला असून गव्हर्नमेंट कॉन्ट्रॅक्टर म्हणून ठेका घेऊन ते आपला उदरनिर्वाह करत असतात. ३ नोव्हेंबर २०२४ ते १२ जानेवारी २०२५ या कालावधीमध्ये वेगवेगळ्या नंबरवरील मोबाईलधारकांनी रोशन पाटील यांच्याशी संपर्क साधून ऑनलाइन गेम खेळल्यास तुम्हाला मोठ्या प्रमाणावर पैसे जिंकून देईल असे आमिष दाखवत सुरुवातीला त्यांना ७ लाख रुपये नफा मिळाला असे भासविले. त्यावर अज्ञात मोबाईलधारकांनी रोशन पाटील यांचा विश्वास संपादन करून वेळोवेळी त्यांच्याकडून ऑनलाइन पद्धतीने तब्बल ७८ लाख ९० हजार ५०० रुपये ऑनलाईन नेट बँकिंग तसेच वेगवेगळ्या बँक खात्यातून स्वीकारले. दरम्यान त्यानंतर पाटील यांना आपली फसवणूक झाल्याचे लक्षात आले, त्यानंतर त्यांनी अखेर रविवारी १९ जानेवारी रोजी दुपारी १ वाजता जळगाव सायबर पोलीस ठाण्यात धाव घेऊन तक्रार दिली. त्यानुसार वेगवेगळ्या अनोळखी मोबाईल धारकांवर फसवणुकीचा गुन्हा दाखल करण्यात आला आहे. पुढील तपास पोलीस निरीक्षक सतीश गोराडे हे करीत आहे.