सावदा-लाईव्ह ट्रेंडस न्यूज प्रतिनिधी । रावेर तालुक्यातील कोचूर खुर्द ग्रामपंचायतीच्या सरपंच ज्योती संतोष कोळी यांना त्यांच्या पदावरून अपात्र ठरवण्यात आले आहे. निवडणुकीनंतर शासनाने दिलेल्या वेळेत वैध जात प्रमाणपत्र सादर न केल्याने जिल्हाधिकारी आयुष प्रसाद यांनी हा निर्णय घेतला आहे. या कारवाईमुळे परिसरात खळबळ उडाली आहे.
कोचूर खुर्द ग्रामपंचायतीच्या सरपंचपदी ज्योती कोळी यांची लोकनियुक्त सदस्य म्हणून निवड झाली होती. नियमानुसार, निवड झाल्यानंतर ठराविक मुदतीत त्यांना त्यांचे जात वैधता प्रमाणपत्र शासकीय कार्यालयात सादर करणे बंधनकारक होते. मात्र, त्यांनी या नियमाचे पालन केले नाही. यामुळे ग्रामपंचायत सदस्या लीलाबाई घनशाम तायडे यांनी त्यांच्याविरोधात जिल्हाधिकारी कार्यालयाकडे तक्रार दाखल केली होती.
या तक्रारीवर जिल्हाधिकारी आयुष प्रसाद यांच्यासमोर सुनावणी झाली. सुनावणीदरम्यान, सरपंच ज्योती कोळी यांनी त्यांचे वैध जात प्रमाणपत्र सादर केले नाही. यामुळे जिल्हाधिकाऱ्यांनी त्यांची बाजू ग्राह्य धरली नाही आणि त्यांना सरपंचपदावरून अपात्र ठरवण्याचा आदेश जारी केला. हा महत्त्वपूर्ण आदेश ३० मार्च रोजी काढण्यात आला.
या संपूर्ण प्रकरणात तक्रारदार लीलाबाई तायडे यांच्या वतीने अँड भोसले यांनी कामकाज पाहिले. जिल्हाधिकाऱ्यांच्या या आदेशाची प्रत रावेर तहसीलदार आणि पंचायत समितीचे गट विकास अधिकारी यांना पाठवण्यात आले आहे. या कारवाईमुळे ग्रामपंचायतीच्या प्रशासकीय कारभारात बदल होण्याची शक्यता आहे. आता लवकरच या रिक्त पदासाठी पुढील प्रक्रिया पार पडणार आहे.
