जळगाव प्रतिनिधी | थकीत वीज बिल वसुलीसाठी गेलेल्या महावितरणाच्या अभियंत्यासह कर्मचार्यांना डोक्यात टिकाव घालून हल्ला करण्याचा प्रयत्न ग्राहकाने केल्याने गुन्हा दाखल करण्यात आला आहे.
सहायक अभियंता जयेश रजनिकांत तिवारी काल दुपारी कार्यालयीन सहायक योगेश जाधव, वरिष्ठ तंत्रज्ञ आत्माराम धना लोंढे, तंत्रज्ञ मधुकर कांबळे व कंत्राटी कर्मचारी गणेश जगन्नाथ नन्नवरे यांच्यासोबत सिंधी कॉलनी परिसरात थकीत वीजबिल वसुलीसाठी गेले होते. या वेळी संंतोषी माता मंदिराजवळील टिकमदास परमानंद पोपटानी यांच्या नावाने असलेल्या वीजमीटरचे २४६० रुपये बिल गेल्या ७५ दिवसांपासून थकबाकी असल्याचे दिसून आले. त्यामुळे तिवारी यांनी पोपटानी यांनाबिल भरण्याच्या सूचना केल्या.
यामुळे संतपलेल्या किशोर टिकमदास पोपटानी यांनी थेट पथकावर हल्ला चढवला. टिकाव उचलून डोक्यात मारण्याचा प्रयत्न केला. झटापट केली. त्यात योगेश जाधव यांच्या कानाला व सोनकांबळे यांच्या पाठीवर दुखापत झाली. दगड उचलून फेकून मारण्याचा प्रयत्न केला. या प्रकरणी तिवारी यांनी दिलेल्या फिर्यादीवरून पोपटानी याच्याविरुद्ध एमआयडीसी पोलिस ठाण्यात गुन्हा दाखल करण्यात आला आहे.
