जळगाव-लाईव्ह ट्रेंडस न्यूज प्रतिनिधी । “ज्या वसतिगृहात आपण शिक्षण घेत आहात, त्याची ओळख केवळ राहण्याचे ठिकाण म्हणून न राहता, ते एक सांस्कृतिक आणि शैक्षणिक केंद्र म्हणून विकसित व्हायला हवे. आपल्या न्याय हक्कांसाठी संघर्ष करणे निश्चितच महत्त्वाचे आहे, परंतु सध्या उपलब्ध असलेल्या संधी आणि सुविधांचा योग्य वापर करून सामाजिक, राजकीय आणि आर्थिक प्रगती साधावी,” असे महत्त्वपूर्ण विचार जिल्हाधिकारी आयुष प्रसाद यांनी व्यक्त केले.
डॉ. बाबासाहेब आंबेडकर यांच्या १३४ व्या जयंतीनिमित्त कवयित्री बहिणाबाई चौधरी उत्तर महाराष्ट्र विद्यापीठ परिसरातील आदिवासी विद्यार्थ्यांच्या वसतिगृहात ‘जिल्हाधिकारी आपल्या भेटीला’ या विशेष कार्यक्रमाचे आयोजन करण्यात आले होते. एकात्मिक आदिवासी विकास प्रकल्प यावल आणि जैन इरिगेशन यांच्या संयुक्त विद्यमाने हा उपक्रम पार पडला.
या कार्यक्रमाच्या अध्यक्षस्थानी जिल्हाधिकारी आयुष प्रसाद होते. त्यांनी आपल्या अध्यक्षीय भाषणात विद्यार्थ्यांशी मनमोकळा संवाद साधला आणि त्यांना उपक्रमशील राहण्याचे महत्त्व पटवून दिले. याप्रसंगी, डॉ. बाबासाहेब आंबेडकर यांच्या ‘वेटिंग फॉर व्हिसा’ या प्रसिद्ध पुस्तकाचा प्रा. संदीप केदार यांनी केलेला मराठी अनुवाद असलेल्या ५०० प्रतींचे मोफत वितरण जिल्हाधिकारी आयुष प्रसाद यांच्या हस्ते करण्यात आले. हे पुस्तक जैन इरिगेशनच्या सौजन्याने विद्यार्थ्यांना उपलब्ध करून देण्यात आले.
कार्यक्रमाचे प्रास्ताविक एकात्मिक आदिवासी विकास प्रकल्प यावलचे प्रकल्प अधिकारी श्री. अरुण पवार यांनी केले. त्यांनी वसतिगृहात उपलब्ध करून देण्यात आलेल्या विविध सोयी-सुविधांची माहिती दिली. या सुविधा मिळवण्यासाठी पालकमंत्री श्री. गुलाबराव पाटील आणि जिल्हाधिकारी यांचे महत्त्वपूर्ण सहकार्य लाभल्याचे त्यांनी आवर्जून नमूद केले.
मंचावर एकात्मिक आदिवासी विकास प्रकल्प यावलचे प्रकल्प अधिकारी अरुण पवार, जैन इरिगेशनचे मीडिया विभाग प्रमुख अनिल जोशी, जिल्हा कृषी अधीक्षक कुर्बान तडवी, सहाय्यक प्रकल्प अधिकारी श्री. प्रशांत माहुरे व श्री. जावेद तडवी, अनुवादक प्रा. संदीप केदार, अनिल सोनवणे, बांभोरीचे सरपंच श्री. बिर्‍हाडे तसेच वसतिगृहाचे गृहप्रमुख श्री. बच्चे व श्री. गाडे यांची प्रमुख उपस्थिती होती.
कार्यक्रमाच्या सुरुवातीला विद्यार्थ्यांनी आदिवासी पारंपरिक वेशभूषा परिधान करून आणि आकर्षक पारंपरिक नृत्य सादर करून जिल्हाधिकारी यांचे उत्साहात स्वागत केले. प्रा. संदीप केदार आणि जैन इरिगेशनचे अनिल जोशी यांनीही यावेळी आपले विचार व्यक्त केले. या कार्यक्रमाला इंदाई प्रकाशनचे देवेंद्र करकरे, वसंत राठोड, संतोष खोपडे यांच्यासह अनेक मान्यवर उपस्थित होते.
कार्यक्रमाच्या समारोपात जिल्हाधिकारी आयुष प्रसाद यांनी विद्यार्थ्यांना केवळ अभ्यासातच नव्हे, तर मैदानी खेळ, नृत्य, व्यक्तिमत्त्व विकास आणि वक्तृत्व कौशल्ये यांसारख्या विविध क्षेत्रांमध्ये सक्रिय सहभाग घेण्याचे आवाहन केले. त्यांनी उपस्थित ५०० हून अधिक विद्यार्थी-विद्यार्थिनींशी मनमोकळी चर्चा केली आणि त्यांच्या प्रश्नांची समर्पक उत्तरे दिली, ज्यामुळे विद्यार्थ्यांमध्ये एक सकारात्मक ऊर्जा निर्माण झाली.
