जळगाव-लाईव्ह ट्रेंडस न्यूज प्रतिनिधी । जळगाव प्रादेशिक परिवहन कार्यालयाने (आरटीओ) मागील आर्थिक वर्षात (एप्रिल २०२४ ते मार्च २०२५) प्रभावी आणि यशस्वी कामगिरी नोंदवली आहे. कार्यालयाने दिलेल्या माहितीनुसार या काळात एकूण ३१ हजार ५९३ वाहन परवाने विविध प्रकारच्या वाहनांसाठी देण्यात आले आहेत. यासोबतच, ३९ हजार ४२८ नवीन वाहनांची नोंदणी कार्यालयात करण्यात आली आहे.
नोंदणी झालेल्या वाहनांमध्ये दुचाकींची संख्या सर्वाधिक असून ती ३२ हजार ५३२ आहे. यानंतर, चारचाकी वाहनांची संख्या ४ हजार ७५९ आहे. व्यावसायिक आणि इतर वापराच्या वाहनांमध्ये ट्रक, टॅक्सी आणि रिक्षांसारख्या वाहनांची संख्या २ हजार १३७ इतकी आहे. यावरून जिल्ह्यात दुचाकी आणि चारचाकी वाहनांची मागणी मोठ्या प्रमाणात असल्याचे दिसून येते.
या महत्त्वपूर्ण कामगिरीबद्दल अधिक माहिती देताना सहाय्यक प्रादेशिक परिवहन अधिकारी प्रवीण बागडे यांनी सांगितले की, मागील आर्थिक वर्षात जळगाव आरटीओ कार्यालयाने केलेल्या या कार्यामुळे शासनाच्या तिजोरीत एकूण १९६ कोटी ५८ लाख रुपयांचा महसूल जमा झाला आहे. वाहन परवान्यांची वाढती संख्या आणि नवीन वाहनांच्या नोंदणीतील उत्साह हे जिल्ह्यातील नागरिकांचा वाहतूक आणि वाहन खरेदीकडे असलेला सकारात्मक दृष्टिकोन दर्शवतो.
