जळगाव-लाईव्ह ट्रेंडस न्यूज प्रतिनिधी | जागतिक ऑटीझम जागरूकता दिनानिमित्त गोदावरी नर्सिंग महाविद्यालयाच्या मानसिक आरोग्य नर्सिंग विभागाच्या वतीने आरोग्य शिक्षण कार्यक्रम व जनजागृती रॅलीचे आयोजन करण्यात आले. हा उपक्रम बी.एस्सी. नर्सिंग पाचव्या सत्रातील विद्यार्थ्यांच्या सहभागाने तरसोद येथे पार पडला.
या कार्यक्रमाचा उद्देश ऑटीझम म्हणजे काय, त्याची सुरुवातीची लक्षणे आणि ऑटीझम असलेल्या व्यक्तींसाठी स्वीकार व आधार यांचे महत्त्व समाजामध्ये पोहोचवणे हा होता. विद्यार्थ्यांनी स्थानिक नागरिकांशी संवाद साधून त्यांना माहितीपूर्ण सत्रांद्वारे मार्गदर्शन केले, माहितीपत्रके वाटली आणि ऑटीझमबद्दलच्या गैरसमजुती दूर करण्यासाठी प्रयत्न केले.
जागरूकता रॅलीमध्ये विद्यार्थ्यांनी उत्स्फूर्त सहभाग नोंदवला. त्यांनी ऑटीझम स्वीकृती आणि समावेश यासंबंधी संदेश असलेले फलक हातात घेतले होते. या उपक्रमाद्वारे ऑटीझमची लवकर ओळख, विशेष शिक्षण आणि कौटुंबिक आधार यांचे महत्त्व अधोरेखित करण्यात आले.
मानसिक आरोग्य नर्सिंग विभागाच्या प्राध्यापकांनी या उपक्रमाचे मार्गदर्शन केले. त्यांनी ऑटीझमच्या व्यवस्थापनाबाबत महत्त्वपूर्ण माहिती दिली तसेच मानसिक आरोग्य सुधारण्यात आरोग्य क्षेत्रातील व्यावसायिकांची भूमिका स्पष्ट केली. स्थानिक नागरिकांनी या उपक्रमाला सकारात्मक प्रतिसाद दिला, ज्यामुळे समाजामध्ये ऑटीझमबद्दल अधिक जागरूकता आणि संवेदनशीलता निर्माण झाली. गोदावरी नर्सिंग महाविद्यालयाच्या प्राचार्यांनी विद्यार्थ्यांच्या प्रयत्नांचे कौतुक केले आणि समाजोपयोगी उपक्रमांमध्ये त्यांचा सातत्याने सहभाग राहावा, असे आवाहन केले.
