यावल–लाईव्ह ट्रेंड्स न्यूज प्रतिनिधी । यावल येथील कृषी उत्पन्न बाजार समितीच्या आवारात शेतकऱ्यांच्या सोयीसाठी नव्या विकासकामांचा शुभारंभ करण्यात आला. रावेर-यावल मतदारसंघाचे आमदार अमोल हरिभाऊ जावळे यांच्या हस्ते या कामांचे भूमिपूजन संपन्न झाले. कृषी क्षेत्राच्या प्रगतीसाठी आणि बाजार समितीच्या आधुनिकीकरणासाठी या कामांना विशेष महत्त्व आहे.
या भूमिपूजन कार्यक्रमात सुमारे पाच स्क्वेअर फुटांचे बाजार ओटे, शेतकरी व व्यापाऱ्यांसाठी जलकुंभ, तसेच अन्य मूलभूत सोयींच्या विकास प्रकल्पांचा समावेश आहे. या सर्व कामांचा अंदाजे चाळीस लाख रुपये इतका खर्च असून, दीर्घकाळ प्रलंबित असलेली ही कामे अखेर प्रत्यक्षात उतरली आहेत. संध्याकाळी पाच वाजता झालेल्या या सोहळ्यात परिसरात उत्साही वातावरण पाहायला मिळाले.
कार्यक्रमाच्या अध्यक्षस्थानी कृषी उत्पन्न बाजार समितीचे सभापती राकेश फेगडे होते. त्यांनी प्रस्तावनेत समितीच्या कार्याचा आढावा घेत शेतकऱ्यांच्या हितासाठी सातत्याने केलेल्या प्रयत्नांची माहिती दिली. आमदार अमोल जावळे यांनी आपल्या भाषणात समितीच्या कार्याचे कौतुक करताना सांगितले की, “शेतकरी आणि व्यापाऱ्यांसाठी उत्तम सुविधा उपलब्ध करून देणे हेच खरी सेवा आहे. समितीने आर्थिक पारदर्शकतेसह प्रगतीचा आदर्श निर्माण केला आहे.”
या प्रसंगी भाजपाचे ज्येष्ठ राज्य सदस्य हिरालाल चौधरी, माजी सभापती नारायण चौधरी, माजी सभापती हर्षल पाटील, जिल्हा उपाध्यक्ष शरद महाजन, माजी जिल्हा परिषद सदस्य आर.जी. पाटील व प्रभाकर सोनवणे, माजी जिल्हा परिषद सदस्या सविता भालेराव, परसाडे सरपंच मिना तडवी, भाजपाचे माजी तालुका अध्यक्ष उमेश फेगडे, तालुकाध्यक्ष सागर कोळी, फैजपूर मंडळ अध्यक्ष उमेश बेंडाळे, किनगाव मंडळ अध्यक्ष अनिल पाटील, सरचिटणीस विलास चौधरी, उज्जैनसिंग राजपूत, माजी नगरसेवक व आश्रय फाउंडेशन अध्यक्ष डॉ. कुंदन फेगडे, तसेच कृषी उत्पन्न बाजार समितीचे माजी सभापती आणि शिवसेना (शिंदे गट) नेते तुषार उर्फ मुन्ना पाटील यांच्यासह संचालक मंडळ आणि कार्यकर्ते मोठ्या संख्येने उपस्थित होते.
या प्रसंगी उपस्थित मान्यवरांनी बाजार समितीच्या प्रगतीशील कारभाराचे कौतुक केले तसेच भविष्यात आणखी शेतकरी-केंद्रित उपक्रम हाती घेण्याचे आश्वासन दिले. कार्यक्रमानंतर आमदार जावळे यांनी उपस्थित सर्व पदाधिकारी आणि शेतकऱ्यांशी संवाद साधत बाजार समितीच्या विकास योजनांचा आढावा घेतला.
