भुसावळ-लाईव्ह ट्रेंडस न्यूज प्रतिनिधी । भुसावळातील डॉ. उल्हास पाटील इंग्लिश मीडियम स्कूलमध्ये ‘स्वातंत्रता सेनानी मनोगत’ स्पर्धेचे आयोजन करण्यात आले होते. या कार्यक्रमात माजी खासदार आणि संस्थाध्यक्ष डॉ. उल्हास पाटील, डॉ. वर्षा पाटील, शाळेच्या प्रिन्सिपल अनघा पाटील तसेच शिक्षक व कर्मचारी वृंद उपस्थित होते.
या स्पर्धेत शालेय विद्यार्थ्यांनी सहभाग घेतला, विशेषत: पहिली ते चौथी इयत्तेतील विद्यार्थ्यांनी आपल्या कलाकृतीद्वारे विविध स्वातंत्र्य सैनिकांच्या वेशभूषा साकारल्या. चिमुकल्यांनी झाशीची राणी, भगतसिंग, सुभाष चंद्र बोस, डॉ. बाबासाहेब आंबेडकर, पंडित नेहरू व सावित्रीबाई फुले यांसारख्या महान स्वातंत्र्य सेनानींची वेशभूषा साकारली होती.
या कार्यक्रमामध्ये विद्यार्थ्यांनी आपली भूमिका साकारून भारतीय स्वातंत्र्य लढ्यातील या महान नेत्यांचे योगदान सांगितले आणि स्वातंत्र्याचे महत्त्व सर्वांना समजावून दिले. शाळेच्या मुख्याध्यापिका अनघा पाटील यांनी या कार्यक्रमात भाग घेतलेल्या सर्व चिमुकल्या विद्यार्थ्यांचे कौतुक केले आणि त्यांना पुढील शिक्षणाच्या मार्गावर प्रेरित केले.
यावेळी विद्यार्थ्यांनी साकारलेली वेशभूषा आणि त्यांचा आत्मविश्वास दर्शवित असलेले भाषण सर्वांना प्रेरणादायी होते. शाळेच्या या उपक्रमामुळे विद्यार्थ्यांच्या मनात स्वातंत्र्यसंग्रामातील महान कृत्यांची जाणीव निर्माण झाली आहे.
