जळगाव लाईव्ह ट्रेंडस न्यूज प्रतिनिधी । राज्यस्तरीय आंतरजिल्हा २० वर्षांखालील मुलांची फुटबॉल स्पर्धा येत्या ११ एप्रिलपासून लोणावळा येथे सुरू होणार आहे. या स्पर्धेसाठी जळगाव जिल्हा संघ निवड चाचणीला मोठ्या उत्साहात सुरुवात झाली असून, पहिल्याच दिवशी ५३ युवा खेळाडूंनी सहभाग घेतला. या चाचणीत जळगावसह भुसावळ, रावेर, चोपडा, अमळनेर आणि पारोळा या भागातील खेळाडूंचा समावेश आहे.
राज्यातील फुटबॉलप्रेमींसाठी ही मोठी संधी असून, ज्या खेळाडूंनी अद्याप निवड चाचणीसाठी नोंदणी केलेली नाही, त्यांना ३ आणि ४ एप्रिलला नोंदणी करून संधी मिळणार आहे. अंतिम संघाची निवड ८ एप्रिलला होणार असल्यामुळे इच्छुकांनी वेळेत हजर राहावे, असे आवाहन संघटनेचे सचिव फारुक शेख यांनी केले आहे. निवड चाचणी दरम्यान खेळाडूंच्या कौशल्य, फिटनेस आणि संघभावनेची कसून तपासणी करण्यात येत आहे. स्पर्धेसाठी उत्कृष्ट खेळाडू निवडले जातील आणि त्यांना राज्यस्तरीय व्यासपीठावर खेळण्याची संधी मिळणार आहे.
राज्यस्तरीय स्पर्धेची तयारी अंतिम टप्प्यात
लोणावळ्यात होणाऱ्या स्पर्धेसाठी सर्व जिल्ह्यांचे संघ तयारी करत असून, जळगाव जिल्ह्याचा संघही त्यासाठी सज्ज होत आहे. गेल्या काही वर्षांत जिल्ह्याच्या संघाने उत्कृष्ट कामगिरी बजावली आहे आणि यंदाही दमदार खेळाची अपेक्षा व्यक्त होत आहे. इच्छुकांनी श्री छत्रपती शिवाजी महाराज क्रीडा संकुल, जळगाव येथे सकाळी ८ वाजता हजर राहण्याचे आवाहन करण्यात आले आहे. राज्यस्तरीय स्तरावर खेळण्याची संधी मिळणार असल्याने युवा खेळाडूंमध्ये उत्साहाचे वातावरण आहे. फुटबॉलच्या माध्यमातून जिल्ह्यातील खेळाडूंना पुढे जाण्याची संधी मिळत असल्याने, ही स्पर्धा त्यांच्यासाठी मोठी संधी ठरणार आहे.
