जळगाव-लाईव्ह ट्रेंड्स न्यूज प्रतिनिधी | भरारी पथकाने एकूण ५ वीज मीटर काढून घेऊन एक वीज मीटर नादुरुस्त असल्याचे सांगून चोरीचा गुन्हा दाखल न करण्यासाठी तडजोडी अंती 1 लाख रुपये स्वीकारण्याचे मान्य करणाऱ्या महावितरण कंपनीच्या दोन वायरमन यांना जळगाव लाच लुचपत पथकाने रंगेहात पकडले आहे. याप्रकरणी शनिपेठ पोलीस ठाण्यात दोघांवर गुन्हा दाखल करण्यात आला आहे.
या संदर्भात अधिक माहिती असे की, तक्रारदार हे जळगाव शहरातील रहिवासी आहे. 2 डिसेंबर रोजी भरारी पथकाने त्यांचे 5 वीज मीटर काढून घेतले होते. त्यातील एक मीटर नादुरुस्त असल्याचे सांगून तुमच्यावर वीज चोरीचा गुन्हा दाखल करायचा नसेल, तर दीड लाख रुपये द्यावे लागेल, अशी मागणी धनराज वायरमन आणि गोटू वायरमन यांनी केली. त्यानुसार तडजोडी अंती 1 लाख रुपये देण्याचे मान्य केले. दरम्यान जळगाव लाच लुचपत प्रतिबंधक विभागाच्या पथकाने मंगळवारी 31 डिसेंबर रोजी दुपारी कारवाई केली होती. यावेळी लाच स्वीकारल्याचे मान्य केल्याचे निष्पन्न झाले. त्यानुसार शनिपेठ पोलीस ठाण्यात गुन्हा दाखल करण्याचे काम सुरू होते. या घटनेमुळे महावितरण विभागात खळबळ उडाली आहे.
