सावदा -लाईव्ह ट्रेंड्स न्यूज प्रतिनिधी । महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ शनिवार, १० ऑक्टोबर २०२६ रोजी जळगाव जिल्ह्याच्या दौऱ्यावर येणार आहेत. या दौऱ्यात ते दुष्काळामुळे बाधित झालेल्या शेतीची प्रत्यक्ष पाहणी करणार असून, शेतकऱ्यांच्या समस्या आणि अडचणी जाणून घेणार आहेत. तसेच बोदवड तालुक्यातील येवती येथे आत्महत्या केलेल्या शेतकऱ्याच्या कुटुंबीयांची सांत्वनपर भेट घेणार आहेत. त्यानंतर दुपारी १ वाजता जळगाव जिल्हा काँग्रेस कमिटी कार्यालयात पत्रकार परिषद होणार आहे.
जळगाव जिल्हा काँग्रेस कमिटीचे (ग्रामीण पूर्व) अध्यक्ष धनंजय शिरीष चौधरी यांनी या दौऱ्याची माहिती प्रसिद्धीपत्रकाद्वारे दिली आहे. जिल्ह्यात दुष्काळसदृश परिस्थितीमुळे शेतीवर झालेला परिणाम आणि शेतकऱ्यांसमोरील अडचणी समजून घेण्यासाठी प्रदेशाध्यक्ष सपकाळ शेतशिवारात जाऊन पाहणी करणार आहेत. दौऱ्याची सुरुवात सकाळी १० वाजता मुक्ताईनगर येथून होणार आहे. बोदवड रोडवरील उड्डाणपुलाजवळ त्यांचे आगमन होईल. त्यानंतर सकाळी १०.३० वाजता ते बोदवड तालुक्यातील हिंगणे येथे पोहोचतील. तेथे दुष्काळामुळे बाधित झालेल्या शेतकऱ्यांच्या बांधावर जाऊन शेतीची प्रत्यक्ष पाहणी करतील. यावेळी शेतकऱ्यांशी संवाद साधून पिकांची स्थिती, शेतीसमोरील अडचणी आणि त्यांच्या समस्या जाणून घेणार आहेत. यानंतर सकाळी ११.३० वाजता सपकाळ बोदवड तालुक्यातील येवती येथे भेट देणार आहेत. येथे आत्महत्या केलेल्या शेतकऱ्याच्या कुटुंबीयांची सांत्वनपर भेट घेऊन त्यांचे म्हणणे जाणून घेणार आहेत. जिल्ह्यातील शेतीची परिस्थिती आणि शेतकरी कुटुंबांच्या अडचणींच्या पार्श्वभूमीवर या भेटीकडे लक्ष लागले आहे.
दौऱ्याच्या अखेरच्या टप्प्यात दुपारी १ वाजता हर्षवर्धन सपकाळ यांचे जळगाव जिल्हा काँग्रेस कमिटी कार्यालयात आगमन होईल. येथे आयोजित पत्रकार परिषदेत ते माध्यमांशी संवाद साधणार आहेत. दुष्काळग्रस्त शेतीच्या पाहणीनंतर ते कोणती भूमिका मांडतात आणि शेतकऱ्यांच्या प्रश्नांवर काय प्रतिक्रिया देतात, याकडे राजकीय वर्तुळाचे लक्ष असेल. या दौऱ्याच्या वृत्तसंकलनासाठी वृत्तपत्रांचे पत्रकार, दूरचित्रवाणी वृत्तवाहिन्यांचे प्रतिनिधी, डिजिटल व ऑनलाइन न्यूज पोर्टलचे प्रतिनिधी तसेच छायाचित्रकारांना उपस्थित राहण्याचे आवाहन जिल्हा काँग्रेस कमिटीचे अध्यक्ष धनंजय चौधरी यांनी केले आहे.
