जळगाव-लाईव्ह ट्रेंड्स न्यूज प्रतिनिधी । जळगावहून चोपड्याकडे जात असताना विदगाव येथील तापी नदीच्या पुलाजवळ मध्यरात्रीच्या सुमारास कारवरील चालकाचे नियंत्रण सुटल्याने कार थेट तापी नदीच्या पात्रात कोसळल्याची भीषण घटना घडली. सुदैवाने या अपघातात मोठी जीवितहानी टळली असून कारमधील तीन ते चार प्रवाशांना किरकोळ दुखापत झाली आहे. सर्व प्रवासी चोपडा येथील रहिवासी असल्याचे समजते.
मिळालेल्या माहितीनुसार, कारमधील प्रवासी जळगावहून चोपड्याकडे जात होते. मध्यरात्री सुमारे तीन वाजेच्या सुमारास विदगाव येथील तापी नदीच्या पुलाजवळ चालकाचे वाहनावरील नियंत्रण अचानक सुटले. त्यानंतर कार रस्त्याच्या कडेला जाऊन थेट तापी नदीच्या पात्रात कोसळली. अपघाताची माहिती मिळताच परिसरातील नागरिकांनी घटनास्थळी धाव घेत कारमधील प्रवाशांना बाहेर काढले. या अपघातात तीन ते चार जण किरकोळ जखमी झाले असून त्यांना तातडीने उपचारासाठी दाखल करण्यात आल्याची माहिती आहे. रात्रीच्या वेळी झालेल्या या अपघातामुळे परिसरात काही काळ भीतीचे वातावरण निर्माण झाले होते. मात्र, स्थानिक नागरिकांनी वेळीच मदत केल्याने मोठी दुर्घटना टळली.
दरम्यान, सकाळी सुमारे दहा वाजता तापी नदीच्या पात्रात कोसळलेली कार बाहेर काढण्यासाठी क्रेन मशीन घटनास्थळी आणण्यात आली. कार बाहेर काढण्याच्या कामामुळे पुलावर दोन्ही बाजूंनी वाहनांच्या लांबच लांब रांगा लागल्या होत्या. त्यामुळे काही काळ वाहतूक कोंडीची परिस्थिती निर्माण झाली. विशेष म्हणजे, याच ठिकाणी काही महिन्यांपूर्वी अशाच प्रकारचा भीषण अपघात झाला होता. त्या दुर्घटनेत एका महिला आणि एका बालकाचा मृत्यू झाल्याचे सांगण्यात येत आहे. वारंवार अपघात होत असूनही तापी नदीच्या पुलालगत आवश्यक सुरक्षा उपाययोजना करण्यात आलेल्या नसल्याने नागरिकांमध्ये संताप व्यक्त होत आहे.
पुलाच्या बाजूला मजबूत संरक्षण भिंत, लोखंडी रेलिंग अथवा सुरक्षात्मक अडथळे नसल्यामुळे वाहनांचे नियंत्रण सुटल्यास थेट नदीच्या पात्रात जाण्याचा धोका निर्माण झाला आहे. या पार्श्वभूमीवर सार्वजनिक बांधकाम विभागाच्या सुरक्षिततेच्या उपाययोजनांबाबत वाहनधारक आणि स्थानिक नागरिकांकडून प्रश्न उपस्थित केले जात आहेत. संबंधित विभागाने या ठिकाणची पाहणी करून अपघातप्रवण भागात तातडीने आवश्यक सुरक्षा उपाययोजना कराव्यात, अशी मागणी होत आहे. वारंवार होणाऱ्या अपघातांची गांभीर्याने दखल घेऊन तापी नदी पुलाच्या धोकादायक भागात मजबूत संरक्षण भिंत तसेच लोखंडी सुरक्षा कठडे उभारावेत, अशी मागणी परिसरातील ग्रामस्थ आणि वाहनधारकांनी केली आहे. भविष्यात मोठी जीवितहानी होण्यापूर्वी प्रशासनाने तातडीने उपाययोजना करणे गरजेचे असल्याचे नागरिकांचे म्हणणे आहे.
