बोदवड-लाईव्ह ट्रेंडस न्यूज प्रतिनिधी । तालुक्यातील लोणवाडी येथील ४२ वर्षीय शेतकरी पोळ्यानिमित्त बैल धुण्यासाठी गेला असता पाण्याचा अंदाज न आल्याने तलावात बुडून मृत्यू झाल्याची दुदैवी घटना आज दुपारी घडली आहे. या घटनेमुळे गावात हळहळ व्यक्त होत आहे.
विनोद वसंत चौधरी (42) रा. लोणवाडी ता. बोदवड असे मयत शेतकऱ्याचे नाव आहे.
याबाबत अधिक माहिती अशी की, पोळा सणानिमित्त शेतकरी विनोद चौधरी हे शुक्रवारी २६ ऑगस्ट रोजी दुपारी पिंपळगाव देवी रस्त्यानजीक असलेल्या बोरलोन या ठिकाणी बैलजोडी धुण्यासाठी गेले असता अचानक पाण्यात बैल बिथरला व त्याचवेळी शेतकर्‍याचा हातातील दोर न सुटल्याने ते गाळात रुतले व नंतर पाण्यात बुडाल्याने त्यांचा मृत्यू ओढवला. तत्पूर्वी अत्यवस्थ अवस्थेत बोदवड ग्रामीण रुग्णालयात दाखल केले असता त्या ठिकाणी त्यांचा मृत्यू ओढवला. शेतकर्‍याच्या मृत्यूने लोणवाडी गावात हळहळ व्यक्त होत आहे. मयत विनोद वसंत चौधरी यांच्या पश्चात पत्नी, आई, मुलगा, मुलगी असा परीवार आहे. याबाबत पोलीसात अकस्मात मृत्यूची नोंद करण्यात आली आहे.
