पाचोरा-लाईव्ह ट्रेंडस न्यूज प्रतिनिधी । पाचोरा शहरात आज पोलिसांनी मोठी कारवाई करत अनधिकृतपणे देशी दारूची वाहतूक करणारी एक कार जप्त केली आहे. गुप्त माहितीच्या आधारे केलेल्या या कारवाईत पोलिसांनी गोविंद पुजारी नावाच्या एका व्यक्तीला अटक केली आहे. पोलिसांनी त्याच्या ताब्यातून सुमारे साडे पंधरा हजार रुपये किमतीची देशी दारू आणि वाहतुकीसाठी वापरली जाणारी १ लाख ५० हजार रुपये किमतीची कार असा एकूण १ लाख ६५ हजार ५०० रुपयांचा मुद्देमाल जप्त केला आहे.
पाचोरा पोलिसांना शहरातील काही भागांमध्ये अवैध दारू वाहतूक होत असल्याची गोपनीय माहिती मिळाली होती. या माहितीच्या आधारे पोलिसांनी सापळा रचला. आज पोलिसांनी संशयित कारला थांबवून तपासणी केली असता, त्यात मोठ्या प्रमाणात अनधिकृत देशी दारू आढळून आली. पोलिसांनी तात्काळ चालकाला ताब्यात घेतले आणि कार जप्त केली. अटक करण्यात आलेला चालक गोविंद पुजारी याच्याविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे. पोलीस पुढील तपास करत असून, या अवैध धंद्यात आणखी कोणाचा सहभाग आहे, याचा शोध घेत आहेत.
