गेल्या चार दशकांपासून पत्रकारितेच्या माध्यमातून सामाजिक कार्यात सक्रिय असलेल्या बाळासाहेब पाटील यांनी राजपूत समाजासह विविध समाजघटकांच्या अडीअडचणीच्या काळात मदतीचा हात देत समाजाभिमुख कार्य केले आहे. त्यांच्या या सेवाभावी कार्यामुळे समाजात सकारात्मक परिवर्तन घडविण्यासाठी त्यांनी महत्त्वपूर्ण योगदान दिल्याचे मान्यवरांनी यावेळी गौरवोद्गार काढले.
जळगाव येथील सुदर्शन लॉनच्या सभागृहात झालेल्या कार्यक्रमात स्व. सुखदेवसिंह दादा गोगामेडी यांना अभिवादन करण्यात आले. यावेळी उद्योजक, गुणवंत विद्यार्थी आणि समाजकार्यात उल्लेखनीय योगदान देणाऱ्या व्यक्तींचा सत्कार करण्यात आला.
या प्रसंगी श्री राष्ट्रीय राजपूत करणी सेनेच्या राष्ट्रीय कार्याध्यक्षा शिलाताई सुखदेवसिंह गोगामेडी, उपाध्यक्ष कट्यारजी, जीवनसिंह राजपूत, प्रदेशाध्यक्ष प्रवीणसिंग राजपूत, आनंदसिंग ठोके आदी मान्यवरांच्या हस्ते बाळासाहेब पाटील यांना शाल, श्रीफळ, सन्मानपत्र आणि समाजभूषण पुरस्कार प्रदान करण्यात आला.
याच कार्यक्रमात त्यांना महाराष्ट्र राज्य कोअर कमिटी अध्यक्षपदी नियुक्तीचे पत्रही देण्यात आले. त्यांच्या या यशाबद्दल पारोळा शहर व तालुक्यातील विविध क्षेत्रातील मान्यवरांनी अभिनंदन करून पुढील वाटचालीस शुभेच्छा दिल्या.
